Ish-ministri dhe eksperti i ekonomisë, Arben Malaj deklaron se qeveria po lejon grumbullimin e borxhit të fshehur nga institucionet shtetërore.

Duke folur për Euronews Albania, ish ministri i Ekonomisë, u bën thirrje qeverisë dhe Ministrisë së Financave të ndërhyjnë menjëherë për mospagesat e borxhit, pasi kjo llogaritet si borxh i fshehur dhe vret ekonominë.

Sipas tij, përmes borxhit të fshehur qeveria po kërkon të shtyjë krizën por kjo vetëm sjell thellimin e saj dhe rëndon mbi financat publike dhe taksapaguesit.

“Nëse nuk merren masa që qeveria menjëherë të vendosë një bllokim të disa shpenzimeve dhe investimeve të panevojshme, atëherë duhet të kuptojmë se ndodhemi në një situatë e cila do ta godasë më rëndë ekonominë, papunësinë, varfërinë dhe stabilitetin e financave publike,” deklaroi Malaj.

“Kjo tregon se qeverisemi në mënyrë joprofesionale, deri diku dhe arrogante, nuk mbahen parasysh eksperiencat pozitive, nuk dëgjohen ekspertët në administratë, gjithçka vendoset nga lart dhe ne qeverisemi nga ministra kokëtundës që kënaqin kryeministrin më shumë si kokëtundës sesa si përgjegjës për mandatet që kanë kërkuar,” shtoi eksperti.

Malaj u shpreh gjithashtu se ekspertët janë të shqetësuar se “qeveria po abuzon me lehtësimin e rritjes së borxhit, kjo materializohet dhe në kërkesën publike të institucioneve ndërkombëtare, sidomos FMN që i ka kërkuar qeverisë shqiptare të fokusohet tek menaxhimi i pasojave pandemisë dhe i pastërmetit, të reduktojë rritjen e borxhit nga projektet e mëdha, Partneritetet Publike Private”.

Sipas tij, PPP-të në Shqipëri janë shpeshherë preferenciale, ku janë të qarta shenjat e korrupsionit.