Asambleja e Partisë Socialiste, e cila përveçse ndryshimeve në parti “prodhoi” edhe kabinetin e ri qeveritar, ka ngjallur reagime të shumta.

Gazetari Klodian Tomorri, me anë të postimi në rrjetet sociale, shkruan se tani do të fillojë tallashi për popullin.

Pasi, sipas tij, në media këto ditë do t’i jepet rëndësi për arritjen e madhe të Shqipërisë, si vendi më i emancipuar në botë me 70 për qind të qeverisë gra

“Tani do fillojë tallashi për popullin. Në media do gjeni këto ditë shumë shkrime për arritjen e madhe të Shqipërisë si vendi më i emancipuar në botë me 70 për qind të qeverisë gra.

Analistë dhe ojf-iste të pavarur do ta quajnë këtë arritjen më të madhe të Shqipërisë që nga koha kur Ismail Qemali ngriti flamurin në Vlorë. Ndërkohë vetë qeveria do të kapë disa lajme në CNN, BBC, etj për këtë sukses historik”, shkruan Tomorri.

Sipas të njëjtit, pas tallashit do jetë ‘business as usual’.

“Tendera, koncesione, tjetërsim i pronës publike me natyrë femërore. Firma grash mbi ligje, vendime apo urdhra që vrasin konkurrencën dhe tregun e lirë.

Por varja këtyre. Se fundja këto janë të parëndësishme. Mjafton që të kemi rekordin botëror të qeverisjes me më shumë gra,” shkruan Tomorri.