Nga mjekja Mirela Rista

Nëse do të përqendroheshim tek ankesat që kanë të bëjnë me infeksionet gjinekologjike, do të përmendja se  më të shpeshta janë infeksionet e rrugëve të poshtme vaginale. Këto infeksione janë edhe më të lehta për t’u diagnostikuar nëpërmjet marrjes së tamponëve vaginale. Zakonisht nëpërmjet këtyre tamponëve evidentohet natyra mykotike e sekrecioneve vaginale, domethënë mykozave, të cilat janë tejet problematike tek gratë.

Po kështu, infeksionet bakteriale nga streptokoku apo bakterie të tjera të ngjashme që merren zakonisht nga zorra e trashë dhe nga rrugët urinare janë gjithashtu të shpeshta.

Këto bakterie infektojnë vaginën nga trakti tretës si pasojë e moslarjes së mirë, duke u transmetuar nga zorra e trashë në vaginë. Po ashtu të pranishme janë edhe infeksionet seksualisht të transmetueshme, si trichomona vaginalis, chlamidia etj. Zakonisht ankesat që paraqesin pacientët kanë të bëjnë me shtim të sasisë së sekrecioneve, ndryshime të viskozitetit të tyre përshembull tek myku sekrecionet janë të trasha si e prerë kosi etj.

Ankesa të tjera lidhen gjithashtu me aromën që kanë sekrecionet, të gjitha këto ankesa na orientojnë drejt problemit dhe shkaktarit.