Varianti i ri i koronavirusit, i emëruar Omicron, po vazhdon të përhapet nëpër botë, ndërsa  besohet se është më infektues se variantet paraprake.

Mjeku Arjan Mezini në emisionin “Open” në Top Channel shprehet se nuk ka vend për panik. Sipas tij, mutacioni është shqetësues për aq kohë sa nuk dimë se sa e rëndë mund të jetë klinika e tij, ndërsa shtoi se mund të ruhemi duke shmangur grumbullimet masive, si dhe të vaksinohemi.

“Nuk mund të nisesh nga simptomat për të bërë profilizimin e një mutacioni. Ne dimë shumë pak dhe po punohet nga autoritetet se sa i rrezikshëm është. Vend për panik nuk ka. E mbështes deklaratën e OBSH, është shqetësues derisa të kuptojmë deri sa e rëndë mund të jetë klinika e këtij mutacioni dhe thjeshtë duhet të ruajmë qetësinë, të shmangim grumbullimet dhe duhet të vaksinohemi”, tha mjeku Mezini.

Ndërsa shefi i Urgjencës Kombëtare, Skënder Brataj tha se simptomat tipike të këtij varianti janë rrufa, sekrecionet, dhimbjet e fytit dhe temperatura për 1-2 ditë.

“Omicroni ka tipike rrufën, sekrecionet, dhimbja e fytit dhe temperaturë 1-2 ditë dhe periudhë rikuperimi më të ulët se më parë.

Sa u izolua shtami, u kapën me vonesë por ishin përhapur shumë. Viurset dhe shtamat e reja janë më transmetuese dhe më pak vdekjeprurëse, ndaj në vendet e tjera merren masa menjëherë”, thotë Brataj.