Ish-kryeministri Sali Berisha i përcolli një mesazh kryeministri Edi Rama nga Fieri, ku u takua me demokratët në kuadër të 31-vjetorit të themelimit të kësaj dege. Berisha kërkoi nga Rama që të hiqte dorë nga skenaret që po thur së bashku me pengun. Berisha tha se nuk do të mposhtet nga asgjë dhe se demokratët do të merren njësoj si me të ashtu dhe me pengun, duke iu referuar kryetarit të Partisë Demokratike, Lulzim Bashës.

“Kam një mesazh kam për Edi Ramën. Hiq dorë nga skenarët e thurur bashkë me pengun tënd kundër demokratëve. Hiq dorë se absolutisht ne merremi njëlloj si me pengun dhe me pengmarrësin. Ne nuk mposhtemi nga asgjë. Ne kërkojmë asgjë tjetër, asgjë tjetër veçse Shtëpinë tonë të uzurpuar, shtëpinë tonë të shndërruar në një burg të vërtetë që s’futet dot asnjëri prej jush”, tha Berisha.

Duke komentuar situatën në PD Berisha tha se Basha ka blinduar dyert, duke e krahasuar me Enver Hoxhën. Berisha nuk i kurseu akuzat ndaj Bashës dhe teksa tha se e ka shndërruar selinë blu si shpellë të grupeve terroriste, duke vendosur dyer e blinde të reja shtoi se më 8 dhjetor do të mbahet një protestë festive e paqësore për zbatimin e vendimit për shkarkimin e Bashës.