Gazetari i BIRN, Besar Likmeta deklaron se deri tani nuk ka parë një punë konkrete nga ana e drejtësisë, lidhur me inceneratorët.

I ftuar në Syri tv, gazetari thotë se një pjesë e kompanive që janë përfshirë, janë të regjistruara në juridiksione offshore dhe abuzimi me inceneratorët mund të jetë më shumë se 430 milionë euro.

“Inceneratori i Tiranës ka kompaninë mëmë në Holandë. Mirel Mërtiri është misterioz dhe ka bërë të pamundur për të mos dalë në sipërfaqen e publikut. Është i lidhur me gjithë kompanitë që kanë përfituar tre kontrata koncesionare, ose përmes partneres së tij Stela Gugallja ose partnerit të biznesit, Klodian Zoto. Paratë tona ai preferon t’i marrë.”-tha Likmeta.

Gazetari tha se është skeptik nëse do zbardhet kjo çështje, ndërsa shtoi se drejtësia nuk e ka bërë punën e saj, në mënyrë të qëllimshme.

“I bëjmë faktet publike ne gazetarët. Mënyra si një gazetar ftohet në komision, është si ekspert. Rama bëri një sherrnajë aty. S’kemi parë një punë të thelluar.  Drejtësia ka bërë një sy qorr dhe një vesh shurdh. Nuk ka një vullnet nga prokurorët, më vjen keq, për një kontratë financiare qindra milionë, do ishte në linjën e shpërdorimit të detyrës.”-tha Likmeta.