“Solidarizohem me Bojken Lakon”, Berisha: Rama e dënoi me tre vite burg se nuk pranoi t’i thurte këngë

Ish-kryeministri Sali Berisha është ndalur te dënimi i këngëtarit Bojken Lako me 3 vite burg, të konvertuara në provë, duke akuzuar se është hakmarrje e kryeministrit Edi Rama, pasi këngëtari nuk pranoi ndonjëherë t’i thurte këngë.

Berisha tha se gjykata e dënoi me 3 vite burg Bojken Lakon për një dritare, ndërkohë që në vend ndërtohen “kate mbi kate” pallatet pa leje.

“Dënimi me tre vite burg i këngëtarit të njohur shqiptar Bojken Lako. Një akt i pashembullt, i paprecedentë, një urrejtje e neveritshme, e sëmurë e Edi Ramës e një njeriu ndaj një këngëtari të mirënjohur.

Për fajin e vetëm se nuk pranoi asnjëherë t’i thurë këngë brendit të Milva Ekonomit, Skënderbuçit të Elisa Spiropalit, Zeusit të Bilalit.

Ai qëndroi këngëtar i pasioneve dhe idealeve të tij, pasardhës i një artisti të shquar shqiptar. Një nga artistët më të shquar, me kontribut të madh në artin skenik të vendit. Gjetën ta dënojnë tre vite burg se paska hapur një dritare pa leje, ndërkohë që ndërtohen kate mbi kate. Duke i shprehur solidaritetin tim të plotë dënoj këtë vendim, dëshmi e shndërrimit të sistemit të drejtësisë në degë ekzekutivi, të një zëri aq të dashur sa Bojken Lako”, u shpreh Berisha.