Kryeministri Edi Rama iu është përgjigjur akuzave të opozitës se po shkatërron zonat e mbrojtura.

Nga Kuvendi, Rama tha se qeveria e drejtuar prej tij i ka zgjeruar këto zona të mbrojtura që deri dje kërcënoheshin nga qeveria e mëparshme.

Po ashtu, Rama  ka folur në Kuvend për Teatrin Kombëtar, për të cilin tha se po të kishte patur mundësi do ta prishte shumë vite më parë.

Rama: Njëri, nga harta e parkut është hequr pjesa e urbanizuar e Ksamilit. është bërë me një logjikë të caktuar nën monitorimin e UNESCO-s, e cila kërkoi rishikimin e zonave të mbrojtura. Ndërkohë që jo vetëm që nuk kemi ngrenë zona të mbrojtura por i kemi gjetur.

Ne i kemi zgjeruar hartën e zonave të mbrojtura që nga lumi i Vjosës, duke ndaluar leje HEC të dhëna prej jush , mbrojtëm tek lumi i Valbonës, ku dhatë 11 leje hidrocentralesh. Gjetëm dy të filluara.

Po ashtu, kemi gjithë zonën e Thethit, Luginën e Shalës, park natyror ka qenë e kërcënuar nfa leje HEC që keni dhënë ju, Munella, përfshirë edhe syrin e Kaltër poshtë, shpallja si zona të mbrojtura ka ardhur për rezultat i agresionit prej lejeve dhe të drejtave të dhëna nga ju që përfaqësoni këtu atë që ishte.

Thatë që stadiumi “Qemal Stafa” ishte ikonë. Ishte në fakt sheshi i përdhunimit të një ikone. Nuk e di a do të shkoni në stadium.

Do e shikoni ikonën, e keni aty. E vetmja gjë autentike e arkitektit dhe e ndërtuar nga italianët, është aty. Tribuna e mbetur autentike e ndërtuar nga italianët hiq relievet e përdhunimit mbi të që i mori buldozeri, është aty. Pjesa tjetër e stadiumit ikonë ishte shto ujë e shto miell në kohën e komunizmit. Nuk kishte lidhje me ikonën italiane.

Fakti që sot aty nga një vend i trishtuar ku gjenin strehë vetëm makinat e vjetra, ku as ekipi kombëtar nuk shkonte se ishte non grata nga UEFA, sot flet vetë.

Për Teatrin, i vetmi problem që kam është që nuk e prisha dot më para. U deshën 20 vjet të humbura kot për një paçavure atje që nuk kishte asnjë vlerë e mori peng 20 vjet skenën kombëtare. Atje nuk pranonte asnjë trupë e huaj që të vinte dhe të luante. Njësoj si në stadium. Ishte jashtë standardeve të sigurisë. Edhe aty do ketë festivale ndërkombëatre teatrosh, evente të huaja. Cdo gjë që mbroni ju duhet shkatërruar.