Kryesore
Berisha: 6 ministra dhe disa deputetë të PS janë kandidatë për ekstradime; Balla ka mbi 100 telefonata me Dumanin
Kreu i PD, Sali Berisha denoncoi nga foltorja e parlamentit se të paktën 6 ministra dhe shumë deputetë të PS janë kandidatë për ekstradime.
Po ashtu, kryedemokrati akuzoi kreun e Grupit Parlamentar të PS, Taulant Balla se ka mbi 100 telefonata me të penduarin e drejtësisë, Nuredin Dumanin.
Po ashtu, Berisha u ndal edhe te votimi i Bajram Begajt si presidenti i ri i republikës me votat e PS të shtunën që lamë pas, duke e konsideruar 4 qershorin si dita e funeralit të sistemit demokratik në vend.
“Denoncoj qeverinë që nuk sjell në parlament marrëveshjen e ekstradimin me vendet e Beneluksit. Të paktën 6 ministra dhe shumë deputetë të PS janë kandidatë për ekstradime.
Së dyti, për Ballën kam një pyetje, sa i pagove Dumanit për të të shpërlarë tek Manhasët. Kjo do dalë dhe nuk është vetëm kjo, se ka mbi 100 telefonata me Dumanin , Sharrën, gozhdën.
E shtuna e 4 qershorit do gdhendet në memorie si një ditë më të zezë në historinë demokracisë shqiptare, ishte dita e funeralit të sistemit demokratik në vend.
Me emërim nga PS të presidentit të ri, sot në vend njësoj si në diktaturë pushtetet janë në dorë të një njeriu. Në pushtetin ekzekutiv cdo ministër, e drejtor është një parti, PS.
Kurrë një kontroll një partiak nuk ka ekzistuar. Sot mediat e mëdha e të vogla me përjashtim kontrollohen nga narkoqeveria. Sektorët jetikë zotërohen nga oligarkët e Ramës. Në 4 qershor u zhduk gjurma e fundit e balancës mes pushteteve. Monizmi Rama e vendosi si trashëgim, përdori frikën, dhunën shtetërore, bandat, frikën, bleu votat dhe largoi mbi gjysmë milioni shqiptarë, bleu ish drejtues të opozitës. Pati mbështetjen e Soros, vuri në kontroll ekzekutivin, sistemin e drejtësisë. Situata është më dramatike se kurrë në 30 vite”, u shpreh Berisha.
Berisha e sqaroi më tej deklaratën e tij në një prononcim për gazetarët në oborrin e Kuvendit. Sipas tij, në dëshmitë e anëtarëve të bandave janë dhënë emra ministrash dhe deputetesh të PS por sipas tij po pengohet marrëveshja e ekstradimit me vendet e Beneluksit.
“Në platformën BQ, dalin disa ministra, deputetë të PS dhe ajo që është më interesante është se dalin edhe komuniko të bandës së Elbasanit në vendet e Beneluksit. Kërkoj sjelljen me urgjencë të marrëveshjeve të ekstradimit në këto vende që po japin një kontribut historik.
Është dramatike situata dhe dëshmitë të anëtarëve të bandës së Elbasanit. Ju garantoj se Taulant Balla është një personazh familjar i bandës, një anëtar me të gjitha atributet sipas dëshmive të banditëve. Kjo përbën një problem shumë serioz. Unë do të insistoj që marrëveshjet të vinë në Kuvend”, tha ai.
I pyetur për emrat e ministrave, ish-kryeministri u shpreh se do t’i sjellë drejtësia e vendeve partnere.
“Emra do të sjellë drejtësia e vendeve partnere. Jam këtu për të deklaruar se marrëveshjet po i pengojnë implikime i politikanëve shqiptarë”, tha ai.