Filma shqiptarë me metrazh të shkurtër që duhet t’i shohësh

Ndoshta ke parë “Shok”, “The Van”, apo të tjerë filma me metrazh të shkurtër, ama mund mos të të ketë rënë rasti të shohësh disa të tjerë. Për këtë, kemi përzgjedhur një listë të gjatë me disa sugjerime nga kinematografia shqiptare. Mund t’i shijosh, vlerësosh, apo të sugjerosh edhe të tjerë tituj. Sigurisht, mund t’i analizosh edhe me një sy kritik.

24 orëshi i një 10,000 lekëshi (2007)

Kohëzgjatja: 20 minuta
Subjekti: Rrugëtimi i një kartëmonedhe 10,000 lekëshe, e cila kalon dorë më dorë dhe tregon situata dhe karaktere të ndryshme. Filmi nuk ka personazhe kryesore dhe gjithçka vërtitet rreth një 10,000 lekëshi.

Më në fund në shtëpi (2014)

Kohëzgjatja: 18 minuta
Subjekti: Në një makinë e cila përshkruan trajektoren Berat-Tiranë, rrëfehet një situatë e cila përcjell një mesazh të qartë: shoqëria po humbet një prej virtyteve më të rëndësishme të saj, atë të shprehisë dhe komunikimit me fjalë.

100 kafe (2008)

Kategoria: Animim
Subjekti: Personazhi kryesor, tipik metropolitan, nuk e mat më kohën me njësi matëse, por me filxhanë kafe. Gjatë kësaj “matjeje”, pret fatin t’i trokasë në derë, nga kafeja e mëngjesit, e deri te filxhani me çaj kamomili dhe valiumi i darkës. Por, nga ta dijë i gjori që në çdo çast e përzë fatin, i cili i qaset në mënyrë jo-konvencionale?

Shelgu dhe Kungulli (2010)
Kohëzgjatja: 12 minuta
Subjekti: Një shelg dëshironte të bëhej një pemë e lartë, që mos të mbetej gjatë gjithë jetës një pemë që loton. Për të realizuar këtë qëllim, i kërkon ndihmë një kungulli. Por si mund ta ndihmojë një kungull një shelg?

Lena dhe Unë (2011)

Kohëzgjatja: 15 minuta
Subjekti: Lena dhe Ardi janë një çift emigrantësh në Amerikë, të martuar prej këmbënguljes së prindërve respektivë, të cilët donin të mbanin të gjallë traditën. Fillimisht, përjetojnë momente komike dhe të ëmbla, derisa arrijnë në një përfundim: të jetojnë edhe për veten! Bazuar në një histori të vërtetë.

The Planting of Trees (2021)

Kohëzgjatja: 30 minuta
Subjekti: Historia e një nëne, e cila kërkon me ngulm varret e bijve të saj që vdiqën në burg.

Thurje #Hashtag (2021)

Kohëzgjatja: 23 minuta
Subjekti: Zana krijon një jetë virtuale me miq dhe njerëz të pasur dhe të rëndësishëm, të cilët në realitet nuk ekzistojnë.

More Beautiful than the Spring (2017)

Kohëzgjatja: 10 minuta
Subjekti: Një grua, në mënyrë krejt të papritur kupton se jeta e saj është thjesht një ëndërr.

Feral (2015)

Kohëzgjatja: 24 minuta
Subjekti: Një djalë i rritur në fshat lufton me të gjitha mënyrat për t’u shkëputur nga mendësia e prapambetur, me qëllim që të edukohet.

Toni (2021)

Kohëzgjatja: 15 minuta
Subjekti: Historia e një djaloshi emigrant, i cili detyrohet të lërë në Shqipëri dhe të dashurit e tij, për të gjetur një të ardhme më të mirë përtej kufijve.

Hekurishtja (2007)

Kohëzgjatja: 25 minuta
Subjekti: Një familje e varfër përpiqet që të mbijetojë. E vetmja mënyrë është duke shitur bakër dhe skrap. Si pasojë e varfërisë, familja nuk përjeton dashuri, mirëqenie, apo përkujdesje, ndaj protagonisti dhe i biri 12-vjeçar detyrohen të vjedhin që të sigurojnë jetesën.

Cheating for Papers (2016)

Kohëzgjatja: 19 minuta
Subjekti: Merita e ka pranuar martesën për letra të bashkëshortit të saj, Azemit. Ngjarjet trazohen kur Anna, gruaja gjermane këmbëngul të vizitojë Kosovën dhe vendet ku Azemi është rritur.

Bini (2018)

Kohëzgjatja: 20 minuta
Subjekti: Një djalë i vogël, i cili vuan dramën e luftës, lidhet shumë me një karamele, ndërkohë që familjarët e tij detyrohen të bëhen refugjatë.

Granatë (2016)

Kohëzgjatja: 18 minuta
Subjekti: Në veri të Shqipërisë, dy fëmijë të pafajshëm vuajnë efektet e luftës. Në të njëjtën kohë, në Londër, një arkitekt ndan përvojën e tij dhe idenë e projektit të ri, i cili do të sigurojë strehë për refugjatët sirianë në Mbretërinë e Bashkuar.

A Country of Two (2016)

Kohëzgjatja: 10 minuta
Subjekti: Pas rënies së regjimit komunist, dy prindër nisen me këmbë me vetëm një qëllim: të kalojnë kufirin grek. Në rrugëtimin e tyre nuk kuptohet nëse ata janë të martuar sepse e duan njëri-tjetrin, apo sepse duhet të jenë me njëri-tjetrin.

Dita e fundit e Loro Shestanit (2012)

Kohëzgjatja: 30 minuta
Subjekti: Tranzicioni i Shqipërisë e detyron Loro Shestanin të dorëzohet. Gruaja i ka vdekur, e bija ka emigruar në Itali dhe ka harruar rrënjët; deti nuk i ofron më peshq…Loro detyrohet që brengat e tij t’ia tregojë pëllumbave.

Muri (2009)

Kohëzgjatja: 39 minuta
Subjekti: Çfarë të shkon në mendje kur në realitet ke vetëm disa orë jetë?

Burimi: IMDb