Berisha flet për “rrezikun e madh” nga “Ballkani i Hapur”, paralajmërimi dhe thirrja për shqiptarët

Berisha flet për “rrezikun e madh” nga “Ballkani i Hapur”, paralajmërimi dhe thirrja për shqiptarët

Kryetari i PD-së, Sali Berisha ka folur për gjenocidin serb në Kosovë gjatë promovimit të librit “Kurre mos harro”, i cili trajton këtë çështje.

Sipas tij, është shumë e rëndësishme që të mbahet qëndrim ndaj gjenocidit serb në Kosovë, ndërsa dënoi ashpër sjelljet e kryeministrit Edi Rama.

Kryedemokrati theksoi se nisma “Ballkani i Hapur” që ka sjellë mosdakordësi mes Tiranës dhe Prishtinës zyrtare, të cilën Rama e mbështet fuqimisht, është një projekt serb dhe rus që synon asgjësimin e Kosovës.

Teksa iu referua një deklarata të Vuçiçit, i cili ka thënë se Serbia do bëhet më e madhe, Berisha u shpreh se “do bëhet më e madhe duke marrë territore nga Kosova”.

“Nëse ka një gjë që duhet të ndaj njeriun e qytetëruar nga ai primitiv është qëndrimi ndaj gjenocidit. Nuk ka asgjë më thelbësore dhe themelore. Më thoni ju mua çfarë ndryshimi ka ky udhëheqësi ynë nga ai i Beogradit.

Por nëse në 1945 projekti ishte siç i shkruante Enver Hoxha Stalinit, Kosovën e lamë se është më e sigurt me Jugosllavinë, por edhe ne do shkojmë drejt saj. Çfarë po ndodh sot? Çfarë është “Ballkani i Hapur” thoni ju? Është asgjësimi i shtetit të Kosovës.

Diktatorët nuk fshehin asgjë, të shiturit thonë ato që i thonë padronët e tyre. Putini tha gjithçka për këto që po bën, nuk i fshehu ai këto. Problemi ishte se të tjerët nuk i besuan. A po i fsheh Vuçiçi qëndrimet e tij? Jo.

A nuk erdhi ai në Kosovë dhe deklaroi se Serbia do bëhet më e madhe. Nga do bëhej më e madhe, nga Kosova. A pati reagim nga plebenjtë e politikës shqiptare?

Tani kërkojnë të na trembin me luftë. Ne jemi shndërruar po aq vasalë sa ishim në 1945, por sot ka edhe një faktor të tretë dhe ky quhet Soros”, u shpreh Berisha.

Ky i fundit paralajmëroi shqiptarët se ndodhen para një rreziku të madh. Ndërsa kërkoi reagimin e këtyre të fundit, iu bëri të qartë se pushtetarë si Edi Rama, kohërat do të jenë të vështira.

“Ky është një projekt i rrezikshëm për kombin tonë dhe ne duhet ta kapërdimë këtë, të shkelim mbi gjenocidet.  Ora dhe koha fton shqiptarët të mos harrojnë se ndodhen para një rreziku. Thirrja ime është të ngrihemi në lartësinë, tu përgjigjemi thirrjeve të miliona shqiptarëve që ranë, u flijuan, u spastruan që ne të mbijetojmë.

Ne nuk duhet të kemi komplekse, asnjë lloj kompleksi nga askush, s’kemi shpallur ndonjëherë luftë, Kosova, që tani e kërcënojnë me luftë. Me klika në pushtet si Rama me vasalë të Beogradit shqiptarët do i kenë kohërat e vështira. Jam optimist që ky agresion serb ndaj shqiptarëve do mbarojë”, tha Berisha.