“E diskutova me Vuçiç”/ Dje kërkoi mirëkuptim për Serbinë që nuk sanksionoi Rusinë, ç’fsheh Rama pas bojkotit të samitit të BE

“E diskutova me Vuçiç”/ Dje kërkoi mirëkuptim për Serbinë që nuk sanksionoi Rusinë, ç’fsheh Rama pas bojkotit të samitit të BE

Kryeministri Edi Rama bëri me dije sot se ka komunikuar me presidentin serb, Aleksandër Vuçiç dhe homologun maqedonas, Dimitar Kovaçevski në lidhje me samitin e ardhshëm të Bashkimit Europian, që do të zhvillohet më 23 qershor në Bruksel.

Sipas tij, nga ky samit pret një tjetër përgjigje negative, sa i takon çeljes së negociatave me BE-në, duke nënkuptuar se të tre vendet, pjesë e Ballkanit të hapur mund të bojkotojnë samitin e Brukselit. 

“Ne diskutuam gjatë sot me liderët e Serbisë dhe Maqedonisë së Veriut për Samitin e ardhshëm të BE-së. Duket se një tjetër “Jo, më fal!” do të jetë ajo që do të dëgjojmë në fund! I gjithë Unioni i rrëmbyer nga Bullgaria, nuk është një spektakël i mirë për t’u parë! Çfarë duhet bërë atje?!”, shkruan Rama në Twitter.

Ky qëndrim ka sjellë një ‘valë’ reagimesh në rrjetet sociale, duke ‘dënuar’ vendimin e kryeministrit.

Por, çfarë fshihet pas kësaj deklarate? Lapsi.al shkruan se dyshimet janë se kryeministri Rama po i bën me këtë akt një qokë presidentit serb Vuçiç, i cili në samit do të përballej me presionin e fortë të vendeve të BE për t’i vënë sanksione Rusisë.

Duke bojkotuar në grup, presidenti serb e shmang këtë trysni.

Rama në politico.eu: Mirëkuptim për pozicionin e Beogradi

Pak ditë më parë, kryeministri Edi Rama i doli në krah Presidentit të Serbisë Aleksandër Vuçiç. Në një intervistë për “politico.eu”, Rama foli për mos vendosjen e sanksioneve nga Serbia drejt Rusisë, duke kërkuar mirëkuptim për pozicionin e Beogradit.

“Duhet të kuptoni se Serbia është në një pozicion shumë të ndryshëm nga shumë vende të tjera, për shkak të historisë së saj, për shkak të lidhjeve të veçanta me Rusinë”, tha Rama.

Ai deklaronte se beson se Serbia duhet të vendosë sanksione, por paralajmëroi se Beogradi, i cili është kryesisht i varur nga Moska për furnizime me energji, nuk duhet të bëhet presion për të bërë shumë shpejt.

“Është vetëvrasëse për ekonominë e tyre. Presioni i tepërt perëndimor ndaj Serbisë mund të jetë i dëmshëm për stabilitetin e rajonit të Ballkanit Perëndimor,” paralajmëroi Rama.

“Ne ndonjëherë duhet të durojmë bashkë me të tjerët dhe të kuptojmë se çfarë po ndodh, përndryshe nuk mund ta mbajmë këtë komunitet të bashkuar për qëllime më të larta dhe më të mira”, theksoi ai.

“Mendoj se Serbia është në rrugën e duhur. Sigurisht, jo me shpejtësinë që mund të na pëlqejë apo mund të dëshirojmë. Por, më besoni, skenarët e tjerë janë vërtet shumë të këqij për të gjithë dhe, veçanërisht, për këtë rajon”, tha Rama.