Kryesore
Berisha paralajmëron revoltë qytetare: Të subvencionohet transporti urban, të përgjysmohet taksa mbi naftën!
Kreu i PD-së Sali Berisha përmes një deklarate për mediat të bërë sot, i kërkoi qeverisë subvencionim të plotë të transportit urban dhe interurban në Shqipëri, si dhe përgjysmim të taksës për litër naftë, me qëllim uljen e çmimit.
Berisha tha se është i vetëdijshëm se Rama s’do t’i marrë parasysh këto kërkesa dhe paralajmëroi një revoltë qytetare.
Po rrënohen buxhetet familjare dhe ajo që po e ndjen në mënyrën më të fuqishme është turizmi. Në këto rrethana emergjente PD kërkon vendosjen e menjëhershme të subvencionimit të plotë, të të gjitha biletave të transportit urban dhe interurban në territorin e Shqipërisë. Ky propozim i PD, nuk është i pabazuar, përkundrazi, është i bazuar në një praktikë të cilën, kanë vendosur një seri vendesh europiane. Ju rikujtoj këtu se sot në Gjermani me një biletë mujore prej 9 eurosh lëviz me të gjitha mjetet që qarkullojnë në këtë vend, në gjithë territorin e saj. Spanja, Portugalia dhe një seri vendesh e kanë shndërruar transportin publik falas. Së dyti PD kërkon përgjysmimin e menjëhershëm të taksimit të naftës, i cili në Shqipëri në vlerën 1,1 euro, është më i larti në botë, dhe është shndërruar në një faktor kryesor të çmimit stratosferik të kësaj lënde djegëse energjitike në Shqipëri. Ulja nga 1,1 në 0,5 euro, do të shoqërohej me një ulje po kaq të rëndësishme të çmimit të naftës.
Ata që mendojnë se arka do boshatiset, kjo s’është e vërtetë. Mjafton që qeveria të zhdoganojë rreth 250 mijë ton naftë që kalojnë jashtë sistemit doganor në Shqipëri. Nuk ka asnjë lloj mundësie nafta kontrabandë, përveç se kur patronohet nga dora e zezë e qeverisë.
Jam i vetëdijshëm se Rama me arrogancën dhe vesin e tmerrshëm të vjedhjes, s’do marrë parasysh këto kërkesa, por e garantoj se qytetarët shqiptar me revoltën e ardhshme, do vendosin për këto kërkesa dhe të tjera, të programit të emergjencës të PD, si indeksimi i çmimeve dhe masa të tjera të rëndësishme”.