Si ishin Santorini dhe Mykonos para Instagramit

Ja si dukeshin Santorini e Mykonos para se turmat e Instagramit të zbarkonin

Santorini dhe Mykonos, dy ndër ishujt më të bukur grekë të cilët sot adhurohen sidomos për jetën e natës dhe aventurat, ishin edhe më magjepsës sesa shfaqen sot në miliona foto të përdoruesve të Instagramit.

Ja si i tregon përmes albumit të tij fotografi veteran amerikan dhe adhurues i Greqisë, Robert McCabe.

“Kur vizitova për herë të parë Santorinin me vëllanë tim në vitin 1954, ne ishim të huajt e vetëm në ishull,” tha McCabe, tani 88 vjeç. “Nuk kishte aeroport dhe as energji elektrike. Për tu lidhur me botën e jashtme duhej të rrije në radhë për të përdorur telefonin e vetëm të ishullit dhe uji nuk vinte nga ndonjë rubinet, por nga një burrë në një karrocë të vjetër me katër rrota. Shërbimi i grumbullimit të plehrave ishte një njeri me dy kosha dhe një gomar,” shtoi fotografi, i cili e ka ndarë kohën e tij midis Amerikës dhe Greqisë dhe ka kaluar pjesën më të mirë të 70 viteve duke eksploruar çdo cep të vendit mesdhetar.

Fotografitë greke të McCabe janë botuar në koleksione të shumta, por asnjëra nuk është më prekëse se dy vëllimet: “Santorini: Portreti i një epoke të zhdukur” dhe “Mykonos: Portreti i një epoke të zhdukur”, nga të cilat janë marrë këto foto.