Po çfarë po bën ky “zullapi diplomatik” nga Tirana? Asgjë. Po asgjë fare.

Nuk i shpëton dot kompleksit se nuk ka ndonjë rol

Gjatë një fjale në Samitin e Ballkanit të Hapur sot në Beograd, kryeministri Edi Rama është rikthyer virtualisht “në vendin e krimit”, kur ka lënë të kuptohet se marrëveshja mes Kosovës dhe Serbisë për lëvizjen me karta identiteti.

Sot dua ta them me krenari e kënaqësi se lëvizja me karta identiteti është një zgjidhje e Ballkanit të Hapur, dje ia kam thënë edhe një gazetareje serbe se nuk do të shpenzohej gjithë ajo energji nëse edhe Kosova apo vendet e tjera do të ishin pjesë e Ballkanit të Hapur. Dua t’i shpreh respektin Presidentit të Serbisë që duke materializuar këtë zgjidhje ka dhënë një mesazh, zgjedhja e parë është paqja. Kjo është rruga… Sot dua ta them me krenari që edhe zgjidhja e lëvizjes me karta identiteti është një zgjidhje e Ballkanit të Hapur. Dua t’i shpreh respektin tim presidentit të Serbisë që ka dhënë një sinjal shumë të qartë për të gjithë, që zgjedhja e parë është paqja

Lexon njeriu këtë qëndrim dhe sepse intuitizon një hile, një dorë të fshehtë pas trupit, një përqeshje të ligë, një të pavërtetë. Lëvizje me kartë identiteti apo pasaportë vetëm është bërë edhe para Ballkanit të Hapur dhe nuk është kjo një ide e re. Nga ana tjetër, Aleksander Vuçiç e lëshoi marrëveshjen me Kosovën nën kushtet e një dialogu të ndërmjetësuar. Dhe kjo ka vlerën e vet. Presioni ndërkombëtar ka vlerën e vet edhe si alibi, pasi një lëshim nën presion mund të mbrohet para opinionit të brendshëm, kur në Kushtetutë e ke Kosovën të shpallur ende si pjesë të shtetit tënd.

Mund të jetë që z. Rama të ketë thënë ndonjë fjalë për lëshim nga pala serbe, por në politikë rëndësi kanë qëndrimet publike, jo dhe aq korridoret. Në fund të fundit, vetë nisma Open Balkan nuk ka një histori zyrtare si nisi e si u ideua, por thjesht u bë fakt dikur në Novi Sad.

Cilido qoftë roli i Shqipërisë, apo Open Balkan në zgjidhjen e një mosmarrëveshjeje mes Serbisë dhe Kosovës, ai nuk gjen prezantim bindës në fjalë në erë si këto të kryeministrit, pasi në dialog me Beogradin Prishtina është përherë në paralojë të SHBA dhe BE-së. Dhe këtë na e thotë Aleksander Vuçiç sa herë bie diskutimi për këtë çështje, kur ai preferon t’I prezantojë shqiptarët si instrumente në duar të Perëndimit kundër Serbisë, të cilën së fundmi e ka paraqitur si në pozitën më të keqe të mundshme në dekadë.

Po çfarë po bën ky “zullapi diplomatik” nga Tirana në këtë rast? Asgjë. Po asgjë fare. Thjesht atë që di të bëjë: të hyjë nga dritarja ku ka ndonjë festë a ndonjë lajm të mirë, e të fshihet e mos flasë kur ka llurbë nga ajo “courtesy of government of Albanania”.

Në fund të fundit ky e ka talent natyral, virtyt madje të ndotë këdo që takon dhe çfarëdo që prek. Fatkeqësia është tek ata që mendojnë se duhet ta besojnë. Shihni si dukej dje Abazoviç i shkarkuar në një takim ku nuk përfaqëson asgjë, thjesht i përkëdhelur I Edi Ramës. Të shpresojmë se kjo nuk do të kalojë edhe tek Albin Kurti i Kosovës, pasi te Vuçiç, z. Rama falet si mik dhe s’kemi pse të mos e besojmë dhe nuk ka ndonjë gjë të keqe, edhe pse Shqipëria falet si çirake.

/Respublica.al