Më shumë se 130 lidere të shoqatave feministe, përfshirë Gloria Steinem dhe Women’s March Action, nënshkruan një letër të hapur në mbështetje të Amber Heard, pesë muaj pas vendimit të gjykatës në favor të Johnny Depp.

“Ne dënojmë turpërimin publik të Amber Heard dhe bashkohemi në mbështetje të saj. Mbështesim të drejtën e të gjithëve për të raportuar partnerin intim dhe dhunën seksuale pa u ngacmuar dhe frikësuar”, shkruhej në letër.

Në qershor, një juri mbështeti Depp-in në gjyqin publik për shpifje mes tij dhe Heard-it, i cili buroi nga një artikull i dhjetorit 2018, ku Heard thoshte se ishet viktimë e dhunës në familje dhe abuzimit.

Emri i Depp nuk u përmend në shkrim, por në padinë e tij kundër Heard pretendoi se kuptohej që fjalën e kishte për të, duke qenë se kishin vetëm dy vite që ishin ndarë.

Pas një gjyqi të gjatë, juria caktoi që Heard duhet t`i japë Depp 10 milionë dollarë dëmshpërblim.

“Reagimi ndaj këtij gjyqi vetëm sa përforcoi pse kaq shumë të mbijetuar të dhunës qëndrojnë të heshtur. Jo vetëm që i frikësohemi hakmarrjes nga personi që na ka abuzuar, por kemi frikë edhe nga izolimi dhe ngacmimi nga të tjerët”, thonë hartueset e letrës.

“Unë personalisht njoh gra që e kanë rimenduar raportimin pasi panë se çfarë ndodhi në internet me Amber Heard”, thotë një nga gratë feministe.

Vetë letra e hapur adresonte në mënyrë specifike ‘ngacmimet’ me të cilat Heard u përball në internet gjatë gjyqit, duke thënë se ishte nxitur nga ‘dezinformimi, mizogjinia, bifobia dhe një mjedis i mediave sociale të monetizuara’.

“… Pretendimet e një gruaje për dhunë në familje dhe sulm seksual u tallën vetëm për argëtim”, shkruhej në letër.