Silicon Valley Bank, banka kryesore për startup-et e teknologjisë amerikane, u përball me një krizë të papritur kapitali duke shpallur falimentin të premten në mëngjes.

Por pse erdhi ky dështim, më i madhi i një banke amerikane, që nga Washington Mutual në 2008?

Çfarë është Silicon Valley Bank?

E themeluar në vitin 1983, SVB ishte e specializuar për marrëdhëniet me kompanitë e teknologjisë dhe të investimit të kapitalit. Ajo siguronte financim për pothuajse gjysmën e kompanive të teknologjisë dhe kujdesit shëndetësor të mbështetur nga sipërmarrjet amerikane. Relativisht e panjohur jashtë Silicon Valley, SVB ishte ndër 20 bankat më të mira tregtare amerikane, me 209 miliardë dollarë asetesh në total në fund të vitit të kaluar, sipas FDIC.

Pse falimentoi?

Rezerva Federale filloi të rrisë në mënyrë agresive normat e interesit një vit më parë për të zbutur inflacionin. Kostot më të larta të huamarrjes ulën vrullin e stoqeve të teknologjisë që kishin përfituar nga SVB dhe gërryen vlerën e obligacioneve afatgjata që SVB dhe bankat e tjera gëlltitën gjatë epokës së normave të interesit jashtëzakonisht të ulëta, gati zero.

Portofoli i obligacioneve prej 21 miliardë dollarësh të SVB-së po jepej mesatarisht 1.79% ndërkohë që yield-i aktual 10-vjeçar i thesarit është rreth 3.9%.

Në të njëjtën kohë, kapitali sipërmarrës filloi të tkurrej, duke detyruar startup-et të tërheqin fondet e mbajtura nga SVB. Pra, banka ishte përfshirë në një mal me humbje të parealizuara në obligacione, pikërisht kur ritmi i tërheqjeve të klientëve po përshkallëzohej.

Si erdhi kolapsi

Të mërkurën, SVB njoftoi se kishte shitur një sërë letrash me vlerë me humbje dhe se do të shiste gjithashtu 2.25 miliardë dollarë aksione të reja për të mbështetur bilancin e saj. Kjo shkaktoi një panik midis firmave kryesore të kapitalit sipërmarrës, të cilët thuhet se këshilluan kompanitë të tërhiqnin paratë e tyre nga banka.

Aksionet e bankës filluan të bien të enjten në mëngjes dhe pasdite ajo po tërhiqte aksionet e tjera të bankave me vete pasi investitorët filluan të kishin frikë nga një përsëritje e krizës financiare 2007-2008.

Deri të premten në mëngjes, tregtimi i aksioneve të SVB u ndërpre dhe ajo kishte braktisur përpjekjet për të rritur shpejt kapitalin, ose për të gjetur një blerës. Rregullatorët e Kalifornisë ndërhynë, duke mbyllur bankën dhe duke e vendosur atë nën kontrollin e Korporatës Federale të Sigurimit të Depozitave.