Historiani, filozofi dhe autori më i shitur izraelit Yuval Noah Harari deklaroi të enjten që kaloi se kryeministri Benjamin Netanyahu mund të hyjë në histori si njeriu që shkatërroi Izraelin.

Harari tha se kryeministri afatgjatë e ka përçarë vendin për të ruajtur jetëgjatësinë e tij politike.

Kjo ka shkaktuar plagë që do të jetë e vështirë të shërohen, tha Harari.

“Nëse Netanyahu do të kishte dhënë dorëheqjen pas dy mandatesh në detyrë, edhe pse nuk më pëlqejnë shumë nga gjërat që ai bëri, mendoj se do të tërhiqej si një nga udhëheqësit më të mëdhenj të Izraelit”, tha Harari gjatë një interviste për Associated Press, në Tel Aviv.

“Tani, trashëgimia që do të lërë është si ndarës i Izraelit, personi që ndau ktheu kombin izraelit kundër vetvetes. Dhe shpresoj… të mos arrijmë deri aty”, tha ai. “Ai mund të hyjë në histori si personi që shkatërroi shtetin e Izraelit.”

Harari është në mesin e shumë akademikëve, drejtuesve të biznesit dhe figurave ushtarake, si aktivë ashtu edhe në pension, që flasin kundër rishikimit gjyqësor.

(Qeveria pretendon se gjyqësori ka pasur deri tani shumë fuqi dhe kërkon një rishikim të gjyqësorit).

Netanyahu, i cili është në gjyq për akuzat për korrupsion, thotë se një plan i ri është i nevojshëm për të frenuar kompetencat e një gjyqësori të plotfuqishëm.

Por kritikët thonë se kjo do ta shtyjë vendin drejt autoritarizmit duke dobësuar sistemin gjyqësor të pavarur dhe duke përqendruar pushtetin në duart e Netanyahut dhe aleatëve të tij. Ndër ndryshimet e propozuara janë: dhënia e kontrollit të koalicionit qeverisës të Netanyahu mbi emërimin e gjyqtarëve dhe autoriteti për të rrëzuar vendimet e Gjykatës së Lartë.

Pas protestave të agravuara, Netanyahu këtë javë la pezull planin dhe nisi negociatat për një kompromis me kundërshtarët e tij politikë.

“Nëse ky lloj pushteti bie në duart e një regjimi autokratik, i cili është gjithashtu një regjim fetar fondamentalist me synime ekspansioniste dhe me këtë besim në supremacinë hebreje, ai do t’i vërë flakën gjithë Lindjes së Mesme,” tha Harari, duke pasur parasysh edhe partitë me të cilat Netanyahu është në koalicion.