Bill Gates ka qenë gjithmonë një zë autoritar kur bëhet fjalë për teknologjinë dhe përparimet në të ardhmen e shoqërisë. Së fundmi ka shprehur se përparimi i ardhshëm teknologjik që do të ndryshojë shoqërinë do të jenë automjetet autonome.

“Ne jemi në ditët e para të epokës autonome. Mezi pres të shoh mundësitë e reja,” tha Gates. Për të, “jemi afër pikës së kthesës” me këtë përparim.

Bill Gates foli për Inteligjencën Artificiale dhe parashikoi se do të ketë “një pikë kthese” në krijimin e automjeteve autonome.

“Makinat autonome do t’i lejojnë shoferit të heqë duart nga timoni dhe ta lejojë sistemin të drejtojë në rrethana të caktuara,” parashikoi Gates.

Gates e krahason këtë teknologji në automjete me ndryshimin që kompjuterët sollën dikur në punën e zyrës dhe që do të shkaktojë një “rimendim” në sistemet e drejtimit. Ndryshimet, sipas manjatit, do të bëhen gradualisht. Ai beson se automjetet me pasagjerë do të jenë të fundit që do ta përdorin atë: “Transporti në distanca të gjata ndoshta do të jetë sektori i parë, pasuar nga dërgesat”, tha ai. 

“Kompanitë e marrjes me qira të makinave humbasin shumë para çdo vit për shkak të aksidenteve të shkaktuara nga shoferët. Kështu që ata janë të etur të kalojnë në flota autonome që janë më pak të prirura ndaj aksidenteve,” vuri në dukje ai.

Më në fund, ai tha, “Mjetet e automatizuara do të përfundojnë të jenë më të lira se automjetet e zakonshme. Dhe nëse, si unë, udhëtoni me makinë, mendoni për kohën që humbisni duke vozitur.”