Kate Winslet dhe Ben Whishaw ishin ndër fituesit e çmimeve televizive BAFTA në Londër, event që u mbajt të dielën mbrëma. Aktorja fituese e çmimit Oskar, me një fjalim domethënës bëri thirrje që të veprohet kundër përmbajtjes së dëmshme në mediat sociale.

Winslet njihet edhe për portretizimin e një nëne të një adoleshenteje të konsumuar nga mediat sociale në “I am Ruth”, një mini-serial në të cilin ajo luajti bashkë me vajzën e saj, Mia Threapleton.

“”Unë jam Ruth” u krijua për familjet që mendojnë se janë peng i rreziqeve të botës së internetit, për prindërit që dëshirojnë të komunikojnë me fëmijët e tyre adoleshentë, por që nuk munden më.”, tha Winslet.

“Për të rinjtë që kanë krijuar varësi ndaj mediave sociale dhe anët e tyre më të errëta: kjo nuk duhet të jetë jeta juaj” Për njerëzit në pushtet dhe për njerëzit që mund të bëjnë ndryshim: ju lutemi kriminalizoni përmbajtjet e dëmshme! Ju lutemi zhdukni përmbajtjet e dëmshme! Ne nuk i duam.

Ne duam që fëmijët tanë të kthehen te ne! Ne nuk duam të rrimë zgjuar të tmerruar për shëndetin mendor të fëmijëve tanë. Çdo i ri që po më dëgjon: Ju lutem kërkoni ndihmë! Nuk është turp të pranoni se keni nevojë për mbështetje, thjesht kërkojeni!”, u shpreh ajo.