Kryedemokrati Sali Berisha ka reaguar lidhur me situatën e tensionuar të krijuar pas mbledhjes së Kryesisë, ku mbështetës të Lulzim Bashës ofenduan deputetët demokratë dhe gazetarët.

Berisha tha se e gjitha ishte skenar i Edi Ramës duke i cilësuar akte të dhunshme dhe të turpshme.

Kryedemokrati dënoi ata persona të cilët tentuan të dhunojnë deputetët dhe gazetarët që ishin duke raportuar.

Berisha: Para se ta mbyll dënoj me forcën më të madhe, gangsterët që kanë kërcënuar gazetarët, të cilët kanë ndjekur gjithë natën një takim, ku ka patur deputetë dhe deputete.

Në vend që të falënderohen për sakrificën e tyre, gazetarët janë përballur me sharje, me kërcënime rrugeçërish, për fajin e vetëm se po bënin me sakrifica të vërteta, detyrën e tyre.

Nuk jam unë që u sugjeroj atyre se cilin lajm duhet të ndjekin apo jo, por ata në asnjë rrethanë nuk mund të fyheshin apo të kërcënoheshin.

Ata që mendojnë se do mbyllin problemet duke fyer dhe kërcënuar gazetarët, janë gangsterë, janë rrugeçërish, nuk kanë asgjë të përbashkët me individë të civilizuar. Po kështu dënoj fyerjet dhe kërcënimet që u janë bërë deputetëve të Kuvendit, akte këto të një politike dhune, të turpshme që ka në origjinë skenarët e Edi Ramës.