Nga Irena Beqiraj

A korruptoi Rama amerikanët, apo politika e jashtme amerikane  është një “derë rrotulluese” që mund të shtyhet me anë të interesave ekonomike ?

Politika e jashtme është politika më pak demokratike nga të gjitha politikat e qeverisë amerikane. Ajo është larg interesave dhe shqetësimeve të elektoratit të përgjithshëm dhe si e tillë historikisht ka qenë vetëm prerogativë e degës ekzekutive.

Në mungesë të interesit ose llogaridhënies ndaj elektoratit amerikan, grupet e interesit (duke përfshirë liderë edhe qeveri të huaja) kanë pasur mundësi të ndikojnë drejtpërdrejt apo tërthorazi në vendimmarrjen e qeverisë amerikane në Uashington, nëpërmjet lobimit, interesave ekonomike, por më së shumti nëpërmjet  pagesave të drejtpërdrejta të kryera ndaj ish-zyrtarëve amerikanë.

Matra është e thjeshtë: “Çfarë nuk blihet me para, blihet me më shumë para”

Të dhënat tregojnë se lobimi i qeverive të huaja është zgjeruar shumë gjatë dekadës së fundit. Që  nga viti 2016, shpenzimet për lobim vlerësohen në shumën 4.1 miliardë dollarë dhe numërohen rreth 2,913 lobistë të rinj të regjistruar.

Katër vendet e Lindjes se Mesme janë ndër dhjetë shpenzuesit kryesorë në lobim. Sipas nivelit të shpenzimeve ato renditen: Katari, Emiratet e Bashkuara Arabe, Arabia Saudite dhe Izraeli.

Një tjetër mjet i përdorur gjerësisht në ushtrimin e “pushtetit të butë” sidomos pas ardhjes së Trump në pushtet janë investimet në biznese dhe institucione financiare amerikane, ku më  i spikaturi ka qenë Fondi i Investimeve Publike (PIF) i kryesuar nga Princi i Kurorës Muhamed bin Salman (MBS).  Gjatë viteve të fundit ky fond ka investuar drejtpërdrejt mbi 7 miliardë dollarë në institucionet ekonomike, sociale dhe kulturore amerikane.

Por thembra e vërtetë të Akilit në sistemin demokratik të SHBA-së, e cila po përdoret intensivisht  për blerjen e mbështetjes amerikane nga qeveritë e huaja është mungesa e plotë të ligjeve që  ndalojnë zyrtarët amerikanë të punojnë ose të bëjnë biznes me një qeveri të huaj pas largimit nga qeveria amerikane. Për më tepër nuk ka asnjë ligj që i ndalon zyrtarët amerikanë të takohen me lobistët  apo të punojnë për qeveri të korruptuara  abuzive, apo jo demokratike .     

Përshembull fondi i investimeve të Arabisë Saudite ka bërë pagesa mahnitëse për ish-zyrtarët e administratës Trump, duke përfshirë 2 miliardë dollarë për Fondin e investimit  privat të Jared Kushner (që pritet të shumëfishojë fitimet me anë të investimeve në Serbi dhe në Shqipëri) dhe 1 miliard dollarë për firmën e ish-Sekretarit të Thesarit, Steven Mnuchin. Po i njëjti fond ka bërë gjithashtu pagesa shumë milionëshe, nëpërmjet LIV Golf, në resortet e golfit në pronësi të ish-presidentit Donald Trump.

Përveç kësaj, siç raporton ” Washington Post”, që nga viti 2016 të paktën 500 vetë në pension nga personeli i institucioneve ushtarake dhe të sigurisë  amerikane kanë marrë punë fitimprurëse duke punuar për Arabinë Saudite, Emiratet e Bashkuara Arabe dhe qeveri të tjera të huaja. Apo që nga viti 2016, 15 gjeneralë dhe admiralë amerikanë në pension kanë punuar si “konsulentë” me pagesa të larta për Ministrinë e Mbrojtjes saudite, me miratimin e qeverisë amerikane.

Nisur nga  fushëpamja  jonë e ngushtë e vendit të vogël, “Rama ka bërë atë që nuk e ka bërë njeri”, ka korruptuar Amerikën e madhe. Ai arriti të blejë Mcgonigal apo po blen Trump, për interesa të pushtetit të tij.

Për fatin e tij të keq as këtu nuk ka ndonjë meritë të veçantë lideri ynë . “Lideri vizionar” i Grenellit , apo “Kryeministri model” i Blinkenit , nuk është gjë tjetër vecse tregtari . Ai nuk ka bërë gjë tjetër vecse si qindra liderë të tjerë edhe pse të korruptuar apo autoritarë, ka blerë mbështetje duke shtyrë  “derën rrotulluese të politikës së jashtme amerikane” e cila lëviz lehtësisht me anë të interesave ekonomike.

Megjithëse refuzojmë ta pranojmë, ka ardhur koha ta ngulisim në kokë se pas çdo “lideri shqiptar të shpallur vizionar nga të huajt”, ka një faturë të majme!