Nga Shënim 

Sot nuk është thjesht një datë në kalendar. 

Sot është një ditë që mbart emocion, kujtime, dhe krenari. Sepse SYRI.net mbush 10 vite. 

10 vite më parë, nisëm si një zë i vetëm, që guxonte të thoshte të vërtetën në një kohë kur e vërteta shpesh fshihej pas interesave, frikës, dhe propagandës. 

Kishte shumë që na cilësonin të çmendur, idealistë.

Na thoshin se do të ishte një portal, si gjithë të tjerët, që do të ishte një numër mes të shumtëve. 

Por në fakt, ne e dinim, ne kishim një mision të qartë që Shqipëria kishte nevojë për një sy që nuk mbyllet asnjëherë përballë padrejtësisë. 

Një sy që sheh dhe flet, flet pa frikë dhe pa kompromis.

Në këto 10 vite, nuk kemi munguar asnjë ditë, kemi qenë aty në çdo ngjarje të madhe, në çdo protestë, edhe kur çmenduria mbylli gjithçka dhe çdo kënd, ne ishim në çdo moment një shpresë. 

Kemi raportuar, hetuar, analizuar, kemi denoncuar. Më shumë kemi folur për ata që nuk kanë zë, kemi treguar të vërtetat që shumëkush përpiqej t’i fshihte.

Por më e rëndësishmja: kemi fituar besimin tuaj të nderuar lexues. 

Dhe ky është çmimi më i madh që një media e lirë mund të marrë.

E dimë që në rrugën tonë këto 10 vite, nuk kemi qenë perfektë. Kemi gabuar, si çdo redaksi që punon me pasion dhe nxitim, sepse siç thotë një fjalë e urtë e jona ‘kush punon  edhe gabon’.

Por kemi mësuar nga çdo gabim, kemi rritur standardet, kemi forcuar etikën, dhe jemi rritur bashkë me ju.

Sot, SYRI.net nuk është më thjesht një portal lajmesh. Sot SYRI.net është një institucion. Është një komunitet miliona njerëzish, jo vetëm shqiptarësh që na lexojnë nga Tirana në Nju Jork, në Kejp Taun të Afrikës së Jugut, në Alaskë, apo Sidnej të Australisë, dhe Rio de Zhaneiro të Brazilit.

Ne jemi zëri që kemi arritur në çdo vend, kudo ku ka qoftë edhe një shqiptar. 

Është një besim i përbashkët se e vërteta ka ende vend në këtë vend. 

Dhe ky besim nuk mund të ndalet.

Të ardhmen nuk e dimë me saktësi, por një gjë e themi besimplotë: 

SYRI.net do të vazhdojë të jetë aty, i lirë, i drejtë, i paanshëm dhe mbi të gjitha i guximshëm.

Faleminderit që jeni me ne. Faleminderit që na lexoni, na sfidoni, na përkrahni. 

Ky 10-vjetor sa i yni më shumë është i juaji të nderuar lexues tanë të përditshëm. 

Le të bëjmë bashkë edhe 10 vite të tjera, edhe më të guximshme, të fuqishme të ndershme, dhe më pranë qytetarit.

SYRI.net do të jetë gjithmonë zëri, e vërteta dhe media juaj.