Nga Iva Grillo

Të gjithë “neutralëve” që sillen si të shqetësuar për cfarë do bëhet me Shqipërinë, tani pas marrjes së mandatit të tretë nga një grupim që ka uzurpuar pothuajse të gjitha institucionet shtetërore (perfshirë sistemin e Drejtësisë), do t’u thoja të njëjtën gjë: dilni përpara pasqyrës dhe hidhini nje sy fytyrës tuaj… mundësisht pa makiazh.

Dil para pasqyrës ti “neutral” që vendose të rrish në shtëpi ditën e votimeve, paçka se ankohesh gjithë ditën, për gjithçka.

Dil para pasqyrës ti “neutral” që më dergon privatisht foto të skandaleve të përditshme, por je shumë buzëhollë për të dalë e votuar, megjithëse lëkura të është bërë zhguall nga abuzimi i pushtetit.

Dil para pasqyrës ti “neutral” që bën sikur zgjedh më të mirin mes listës së kandidatëve të partisë në pushtet duke “harruar” faktin se vota i shkon skuadrës uzurpatore e ky kandidat do të “kullufitet” shume shpejt nga egoja e të njejtit “bajloz” që ka kullufitur plot të tjerë para tij.

Dil para pasqyrës ti “neutral” që tallesh e përqesh çdo lloj “Gjergj Elez Alie” që shfaqet ashtu i dobët e trup-plagë për t‘u përballur me “bajlozin”, i cili do të vijë nje dite në pragun e derës tënde.

Dil para pasqyrës ti “neutral” që nuk ke ngritur kurrë zërin për asgjë me “zarar” por pret që për ty të flasin të tjerët.

Dil para pasqyrës ti “neutral” që jeton në delir, në pritje të një alternative politike “super-natyrore” perfekte, që do të reflektoje natyrën tënde po aq perfekte.

Dil para pasqyrës ti “neutral” që shpenzon muaj të na mbushësh mendjen që të gjitha alternativat janë njëlloj, por momentin e fundit ia fut votën tënde ne xhep pushtetit. E pra ti e ke zgjedhur “më të mirin” tënd.

Ti nuk je neutral ndaj alternativave, ti je tolerant ndaj shtypjes.

E ndërsa ti je i preokupuar me perfeksionizmin e neutralitetin tënd “trendy”, pushteti i ka shtrirë tentakulat e veta edhe për të paktën katër vite të tjerë… katër vite nga jeta jote dhe e fëmijëve të tu.

Koha për të zgjedhur mbaroi! Na e kurse shqetësimin tënd tani!

Çfarë thotë pasqyra o “neutral”: Të pëlqen ajo që shikon?!