Gjatë fjalës në shkallët e selisë së Partisë Demokratike, Lulzim Basha, deklaroi se nuk do të ketë një Kuvend në PD, ku të shqyrtohet vendimet “e qeverisë së SHBA”.

“Sa i përket pretendimeve, për referendume dhe kuvende, kuvend të Partisë Demokratike, për të marrë nën shqyrtim vendimet e qeverisë amerikane, nuk ka për të patur“, deklaroi Basha.

Po çfarë do të thotë kjo?

Në fakt, Sali Berisha nuk ka kërkuar që të mbahet një Kuvend për të shqyrtuar vendimin e SHBA-ve për shpalljen e tij non-grata. Një kërkesë e tillë do të ishte absurde. Ajo që kërkon Berisha, është të mblidhet Kuvendi i PD, të mbahet një referendum, për përjashtimin e tij nga grupi parlamentar, vendim ky personal i Lulzim Bashës, pa pyetur asnjë strukturë dhe askënd në PD.

Dhe pikërisht këtu është manipulimi që bën Lulzim Basha. Duke dashur të minojë përfundimisht demokracinë brenda partisë që drejton, ai po fshihet pas “amerikanëve”, për të mos i dalë zot vendimit që ka marrë dhe për të mos lejuar procese normale për një parti politike, siç është mbledhja e Kuvendit.

Shtetet e Bashkuara të Amerikës, as nuk e kanë tagrin të bëjnë përjashtime nëpër parti politike dhe në grupet parlamentare dhe as e kanë marrë përsipër një vendim të tillë në rastin e Berishës.

Në intervistën e Yuri Kim për Zërin e Amerikës, ku ajo u pyet nëse Lulzim Basha ka qenë i detyruar të marrë vendimin për përjashtimin e Berishës, ajo tha se “udhëheqësit duhet të marrin përgjegjësi për vendimet e tyre”, duke i dhënë një mesazh të qartë Bashës, për të marrë përgjegjësi lidhur me përjashtimin e Berishës dhe për të mos vijuar me narrativën se ky është një vendim i Amerikës.

“Shikoni, ky është një vend i lirë. Është vend aleat në NATO. Dhe udhëheqësit duhet të marrin përgjegjësi për vendimet e tyre. Për sa i përket Shteteve të Bashkuara, pozicioni ynë ka qenë shumë i qartë që nga fillimi në lidhje me personat e përcaktuar. Dhe, nuk kam gjë tjetër për të shtuar për këtë çështje”, deklaroi Kim për VOA.

Sigurisht, shpatullat e brishta të Lulzim Bashës, ndoshta nuk e mbajnë dot peshën e vendimit që ai ka marrë. Por, fshehja pas amerikanve, a thua se qeveria amerikane tani vendos edhe kush do të jetë nëpër grupet parlamentare të partive në Shqipëri, është një manipulim shumë qesharak. Por mbi të gjitha, argumenti se forumet e një partie nuk mund të mblidhen “se vendimet i ka marrë Amerika”, është keqpërdorim SHBA-ve dhe poshtërim deri në ekstrem i partisë.