Bashkimi Evropian deri tani nuk ka dhënë as një sinjal pozitiv për çeljen e negociatave me Shqipërinë. Bisedimet për integrimin vijojnë ende të mbeten pezull.

Në një intervistë për RTV Ora, ish-deputeti demokrat Aldo Bumçi u shpreh se kryeministri Edi Rama është i pari që po tenton të krijojë një urrejtje për BE-në. Sipas tij, Rama kërkon të fajësojë BE-në për mos çeljen e negociatave.

“Jo është një gjuhë e njohur e Kryeministrit që kërkon të fajsojë  BE, vendet anëtare, pse nuk janë hapur negociata për tetë vite. Jemi në një periudhë jo të re. As Nano, as Berisha, Majko dhe Meta nuk kanë pasur asnjëherë këtë gjuhë  ndaj BE. Rama është kryeministri i parë shqiptar që ka përdorur një gjuhë të ashpër, që nuk i përket shqiptarëve. Gjuha që përdor Rama është kërcënuese ndaj BE, dhe duke nxitur ndjenja anti-europiane. Rama e vë ‘topin’ te ata dhe asnjëherë tek vetja. Madje ka bërë kërcënime që Shqipëria kërcënohet nga radikalizmi islamik, e pavërtetë nuk ka një rrezik të tillë. Nuk mundet Kryeministri i vendit ta shfaq vendin e tij si një vend ku ka rrezik të islamizmit radikal,” tha Bumçi.

Ndër të tjera, Bumçi shtoi se Shqipëria ka pasur një mbështetje nga ndërkombëtarët. Sipas tij, raporti i KE-së ka zbuitur problemet që në fakt Shqipëria i ka të dukshme, duke përmendur këtu mungesën e gjykatave.

“Shqipëria ka pasur një mbështetje të jashtëzakonshme. Raportet e KE i thonë të vërtetat por kanë qenë shumë dashamirëse për të nxitur hapjen e negociatave. Kanë mbyllur dhe ndonjëherë sytë për fakte shumë të dukshme. Ca vende anëtare i kanë thënë si mundet që ju prodhoni një raport kur s’ka asnjë problem. Ne kemi problem të dukshme, s’kemi Gjykata. Komisioni ka arritur deri aty sa ti zbusë problemet. Merkel filloi procesin e ‘Berlinit’ që të motivonte vendet. Çfarë bëri Rama? Këtë dashamirësi të europianëve, e përktheu në një periudhë kur ne nuk bëmë asnjë hap përpara,” u shpreh Bumçi.