Deputeti demokrat Dashnor Sula ka treguar detaje nga takimet e fundit me Lulzim Bashën, para se ai të jepte dorëheqjen.

I ftuar në ABC News, Sula u shpreh se Basha ka mbajtur shënim në një bllok gjatë gjithë kohës dhe nuk ka bërë debat me asnjë nga deputetët. Sipas tij, qëllimi i Bashës është ta mbajë atë bllok si një “provë”, për të treguar sjelljet dhe qëndrimet që ka pasur çdo deputet gjatë mbledhjeve.

Sula shprehet se Basha bllokun në fjalë, do t’ia dorëzojë kryetarit të përjetshëm në PD, duke theksuar se ka dy kopje të këtij blloku.

“Më bëri përshtypje se gjatë 5 orëve Basha nuk debatoi me një deputet. Dhe vetëm shkruante. Dhe në momentin që fliste shpejt dikush, Basha u thoshte që prit mos flit shpejt se do e shkruaj këtë.  I merrte të gjitha shënim, 5 orë. Nuk u kuq nuk u verdh dhe aq më tepër për t’u nxirë. Kurrë nuk bëri debat dhe vetëm shkruante. Janë dëshmitarë deputetët, u kam thënë që Basha duhet ta ketë temperaturën e trupi 35 gradë. Është i ftohtë, nuk kuqet nuk zverdhet nuk i lëviz nervi është rast për studim. Këtë kam thënë. Më 12 mars kam folur 35 minuta në mbledhje dhe Basha vetëm shkruante dhe i mbajti shënime. Arsyeja se pse Basha ka mbajtur shënim në bllokun e tij, të gjitha fjalë nga data 7 mars deri në më 12 mars është që ai të jetë një bllok që do i dorëzohet kryetarit të përjetshëm të PD. Që të kuptojë se cilët janë sjelljet dhe qasjet të secilit deputet në mentalitetin e tyre kanë për të vazhduar grupin parlamentar. Ky bllok është që një kopje e ka zoti Basha dhe një kopje të jetë dorëzuar në një vend tjetër për të kuptuar çasjen dhe sjelljen të secilit deputete, se si  do të jetë gjendja tani në PD dhe Grupin Parlamentar. Unë e shoh të zymtë. Dhe deklarata që është unifikuar nuk është e vërtetë”, tha Sula.