Analisti Fatos Lubonja ka komentuar qëndrimin e kryeministrit Edi Rama mbi ngjarjen e ndodhur dje në Himarë ku një 7-vjeçare humbi jetën si pasojë e goditjes nga një skaf.

I ftuar në News 24, Lubonja tha se Rama e ka ndërtuar gjithçka mbi gënjeshtra dhe propaganda, dhe në momentin kur media apo opozita i reflektojnë të vërtetën, kryeministrit nuk i pëlqen.

Lubonja ngre si shqetësim mungesën e reflektimit për ngjarjen në Himarë, teksa shprehet se drejtësia e  kapur nuk jep më garanci për qytetarët.

“Është në natyrën e tij dhe kulturën tonë thyerja e pasqyrës. Meqë në fillim kemi thënë që opozita e media është pasqyra që shohim veten e ti respektosh si pushtete të ndara, kur gjithçka e ndërton me propagandë e gënjeshtër, nuk i do pasqyrat, do thyesh pasqyrën. Opozita e ka përdorur për qëllimet e veta politike, por shih problemin ku e ke. Si ka mundësi që të fortët kanë kapur gjithçka dhe raportin që ke me ta, i ke përdorur për votat, i lufton dot apo jo. Pastaj kapet me Metën e Saliun.

Ajo që më shqetëson është se nuk ka reflektim. ‘Krimi mbjell krimin’, kur bën krim kërkon ta mbulosh e do bësh krim tjetër. Më shqetësuese është që është kapur edhe drejtësia, e cila nuk vepron e nuk të jep garanci. Kur drejtësinë e bën “Kadiu”…

Ky person ka hyrë në një zonë që nuk duhet të hyjë sepse ai vetë e di se është polic. Ti duhet ta dish që nuk mund të hysh me një skaf të tillë në një zonë ku ka plazhistë edhe nëse nuk ka pasur shënjestrues.

Meqë ky e di ligjin e shkel sepse nuk ka frikë nga ligji, se thotë kam bërë për këtë parti e këtë pushtet. Ky është problem i madh. Drejtësia duhet të veprojë që këtyre njerëzve të mos u japë këtë guxim”, u shpreh Lubonja.