Berisha: Kompania që do investojë në Portin e Durrësit, shërben si mburojë e Ramës

Kryetari i Partisë Demokratike, Sali Berisha ka vijuar me akuzat e tij në drejtim të kryeministrit Edi Rama, në lidhje me projektin për Portin e ri turistik të Durrësit, të cilin e konsideron aferë korruptive.

Në një bashkëbisedim me ekspertë dhe përfaqësues të biznesit, Berisha u shpreh se kompania që do kryejë investimin, do të shërbejë si mburojë për Ramën, për të fshehur vjedhjet e tij.

“Në Shqipëri ndodh një nga vjedhjet më të tmerrshme që mund të bëhet. Vjen një kompani nga Emiratet e Bashkuara dhe shërben si mburojë e kryeministrit të vendit, për të plaçkitur më shumë se 1 mln e gjysëm katror tokë në Portin e Durrësit. Ka një emër, kullë të lartë në Dubai, por ka një mashtrim po aq të madh sa kulla, në Savë, Beograd, këtu afër nesh.

Kjo është e vërteta e këtij investitori. Por nuk ka asnjë rëndësi, rëndësi ka që shërben si mburojë e Edi Ramës. Kompani të tjera gjigante, instalohen në kushtet që duan, pa garë. Pa garë jepet Skavica, qindra milionë. Pa garë merren 760 mln buxhet”, theksoi Berisha.

Ditën e djeshme, Berisha i ka bërë thirrje Bashkimit Evropian që të ndalojë projektin për Portin turistik të Durrësit.

Ai kërkoi që Bashkimi Evropian të përdorë të gjithë autoritetin e tij dhe të nisë hetimet për të bërë të mundur që Porti i Durrësit, të mbetet port strategjik kryesor i vendit, por edhe i rajonit.