Berisha: Afera e inceneratorëve vazhdon, hetimet janë fake

SPAK po përdoret si një instrument për hetime “fake” për të mbuluar vazhdimin e aferës.

Kryetari i PD-së, Sali Berisha doli në një deklaratë për mediat lidhur me të ashtëquajturën aferë e inceneratorëve. Duke nënvizuar zyrtarët e lartë të përfshirë, Berisha tha se bëhet fjalë për një kompleks veprash penale.

Ai dënoi vijimin e pagesave për inceneratorin e Fierit, në një kohë që kompania është nën sekuestro, apo edhe për të Tiranës, kur administratorët janë në kërkim.

Sipas tij, këto dëshmojnë se SPAK po përdoret si një instrument për hetime “fake” për të mbuluar vazhdimin e aferës.

“Engjëll Agaçit, Arben Ahmetajt, Lefter Kokës, Erion Velisë, nuk ka ligj, nuk ka institucion, nuk kë forcë në kteë vend që mund t’u bëjë gjë. Kështu, muaj më parë, SKAP-i i partisë, në njoftimin zyrtar për këtë aferë gjigante, që tejkalon 420 milionë euro, njofton se bëhet fjalë për korrupsion, procedura prokurimesh antiligjore, falsifikime dokumentesh, larje parash, tjetërsime pronash.

Pra, një kompleks veprash penale nga më seriozet. Me gjithë këtë, kjo ndërmarrje kriminale, kjo aferë kriminale është e vetmja në Europë dhe në botë, mbi të cilën kanë rënduar akuza të tilla dhe janë shpallur në kërkim menaxherë dhe pronarë të saj, ajo vazhdon njëlloj sikundër asgjë nuk ka ndodhur, sikundër asgjë nuk është konstatuar, sikundër asnjë mandat arresti apo shpallje në kërkim nuk është lëshuar, sikundër askush nuk është burgosur në këtë aferë.

Ftoj çdo shqiptar të shtrojë pyetjen: si mundet pas të gjithë këtyre akuzave, pas shpalljes në kërkim të pseudopronarëve të kompanive të djegësave, qeveria e Edi Ramës dhe Ministria e Financave, të disbursojë gjer sot, rreth 100 milionë euro. Të vazhdojë të disbursojë plotësisht të gjithë shumën e parashikuar për djegësin e Fierit. Mbi 6 milionë euro. Të gjithë shumën e parashikuar për djegësin e Tiranës. Të ndërtojë, të urdhërojë OSHEE-në të ndërtojë, linjën e tensionit të lartë për djegësin e Tiranës, me një shumë prej 6 milionë eurosh. Si mund të ndodhin këto? Këto ndodhin, kjo aferë kriminale vazhdon jetën e saj për faktin e vetëm se kjo është aferë e Edi Ramës”, u shpreh Berisha.