Në një kohë si kjo që po përjetojmë, me inflacion në nivele historike dhe çmimet e gjithçkaje, nga faturat e deri te fluturimet ajrore, të cilat janë në rritje, është thelbësore të dini se si t’i menaxhoni paratë tuaja, duke i ndarë ato në mënyrë të drejtë midis shpenzimeve dhe parave të hequra mënjanë.

Të mësosh artin e kursimit nuk është aspak e lehtë, kërkon këmbëngulje dhe vendosmëri. Por ndonjëherë pjesa më e vështirë është vetëm fillimi.

Po  ju sjellim një udhëzues me një strategji të thjeshtë dhe realiste që do t’ju mësojë se si të kurseni në afat të shkurtër dhe afatgjatë.

1. Mbani shënim të gjitha shpenzimet

Hapi i parë për të filluar kursimin është të kuptoni se sa po shpenzoni. Filloni duke shënuar të gjitha shpenzimet që keni; dmth çdo kafe, sende shtëpiake dhe pazar në supermarket. Pasi të keni mbledhur të gjitha të dhënat tuaja, organizoni numrat sipas kategorive. Për shembull, shpenzime thelbësore si farmaci, ushqime dhe kredi apo qira, apo shpenzime të panevojshme si darka në restorant, ose shpenzime kulturore, nëse për shembull keni blerë një libër të ri. Çdo fundjavë, mblidhni shumat dhe reflektoni mbi zakonet tuaja.

2. Krijoni një buxhet për shpenzimet

Pasi të keni një ide se sa do të shpenzoni në një muaj, mund të filloni të organizoni financat tuaja, të shkurtoni disa kosto shtesë dhe të vendosni një buxhet të saktë. Ky buxhet duhet të llogaritet bazuar në të ardhurat tuaja dhe shpenzimet thelbësore fikse. Duke bërë këtë, ju mund të planifikoni daljet dhe të kufizoni kostot e panevojshme. Sigurohuni që të merrni parasysh shpenzimet që ndodhin rregullisht, por jo çdo muaj, siç është edhe mirëmbajtja e makinës.

3. Mundohuni të shkurtoni disa shpenzime

Nëse shpenzimet tuaja janë aq të larta sa nuk mund të kurseni sa të doni, mund të jetë një kohë e mirë për të ulur kostot. Identifikimi i gjërave jo thelbësore për të cilat mund të shpenzoni më pak nëse dëshironi (si benzina ose vaktet jashtë shtëpisë) do t’ju ndihmojë të mbani nën kontroll shpenzimet tuaja. Por jo vetëm kaq, ju mund të kërkoni mënyra për të kursyer në shpenzimet mujore fikse si plani tarifor i telefonisë celulare; ose anuloni abonimet që nuk i përdorni, veçanërisht nëse ato rinovohen automatikisht.

4. Vendosni qëllim kursimin

Një nga mënyrat më të mira për të mësuar se si të kurseni para është të vendosni një qëllim. Filloni duke menduar pse mund të dëshironi të kurseni. A keni nevojë të blini një makinë, të planifikoni një pushim ose të kurseni për një pallto të re? Pasi të kuptoni se për çfarë dëshironi të kurseni, zbuloni se sa para do t’ju nevojiten dhe sa kohë mund të duhet për t’i kursyer ato.

Këshilla është që të vendosni një objektiv të vogël dhe të arritshëm afatshkurtër për ju për diçka që aktualisht nuk keni si ta paguani, si për shembull një ditë në SPA me masazh, një çantë të re ose një fundjavë larg. Arritja e qëllimeve më të vogla dhe shijimi i shpërblimit për të cilin keni kursyer mund t’ju japë një nxitje psikologjike që e bën kursimin më të lehtë dhe e përforcon këtë zakon.

5. Bëjini të qarta prioritetet tuaja

Pasi të keni llogaritur të ardhurat dhe shpenzimet fikse dhe të keni përcaktuar sasinë e parave që dëshironi të lini mënjanë çdo muaj, përqendrohuni në mënyrën e shpërndarjes së kursimeve tuaja. Sigurohuni që të mos harroni qëllimet tuaja afatgjata si psh dalja në pensikon të mos kalojë në plan të dytë ndaj nevojave afatshkurtra. Sugjerimi është që të fokusoheni në dy ose tre objektiva me afate të ndryshme. Kjo do ta bëjë më të lehtë planin tuaj të kursimeve dhe do t’ju ndihmojë të mbani nën kontroll qëllimet tuaja.