DY TELEVIZIONE DHE NJË PARTI E RE GATI PËR ZGJEDHJET VENDORE

Valmora Gogo

Në Shqipëri jemi mësuar jo vetëm me parti por edhe me parti-projekte apo kandidatë-projekte. Mjafton të kujtojmë projekte afatshkurtra që kanë dashur të influencojnë zgjedhjet, ndër më të suksesshmit mes tyre padyshim Gjergj Bojaxhi, por edhe “Libra” e Ben Blushit, “Nisma Thurje” e Besjan Peshës dhe Endrit Shabanit si dhe Rudina Hajdari. Në këto ujëra ka qenë edhe “Organizata Politike”, shpesh një protagoniste në protesta të ndryshme.

Megjithatë, me sa duket kaq nuk mjafton.

Zgjedhjet vendore kërkojnë sa më shumë alternativa politike që të sistemojnë elektoratin gri, votuesit e pavendosur. Situata politike në Shqipëri në kuptim të risisë së emrave politikë duket se nuk po del dot nga stanjacioni me parti si ajo e Edi Ramës, partinë e Ilir Metës dhe kryesoren e opozitës; partinë e Sali Berishës.

Mirëpo Arlind Qori i Organizatës Politike ka menduar ta fuqizojë e formalizojë iniciativën e tij me partinë “Bashkë”.

Dy televizione të rinj

Nuk kaloi shumë kohë që pas konfliktit me pushtetin dhe shembjes së hotelit të tij në Durrës, Irfan Hysenbelliu të ndërmerrte nismën e tij në krijimin e televizionit “Panorama Televizion”.

“Panorama TV do të jetë zëri i qytetarëve, dritarja e pasqyrimit me korrektesë dhe profesionalizëm të të gjitha problematikave, debateve politike, informacioneve nga aktualiteti dhe sporti. Ne Panorama TV do t’i kushtohet një vëmendje e veçantë bashkive, të cilat prej kohësh janë lënë në hije.”, prezanton nismën stafi i Hysenbelliut. Ky do të jetë një WebTV, ku audienca mund ta gjejë në Webin ekzistues të “Panoramës” si gazetë apo në “Youtube”.

Një tjetër nismë po i bashkohet peizazhit mediatiko-politik të Tiranës; “CNA HD”.

Televizioni informativ i njoftuar nga Elvi Fundo do të ketë si partnerë të vetëm “qytetarët, zërin dhe problemet e tyre, kundrejt çdo padrejtësie që vjen nga politika, drejtësia dhe në çdo fushë tjetër.”

Influenca mbi elektoratin e pavendosur

Sa i suksesshëm mund të jetë Arlind Qori nëse i futet kandidimit në Tiranë? A do jetë partia e Qorit parti-projekt për të mbledhur sa më shumë nga elektorati gri duke ngushtuar merakun e maxhorancës apo realisht po punon për qytetarët e zhgënjyer nga 10 vjet qeverisje të Edi Ramës?!

Çfarë të reje mund të sjellin dy televizionet, ai i Irfan Hysenbelliut, i cili e ka tashmë një të suksesshëm si “News24” apo televizioni i ri i njoftuar nga Elvi Fundo?! A janë këto shenja rebelizmi ndaj pushtetit të Ramës që parashikohen të qëndrojnë gjatë apo thjesht televizione-projekte?!

Përgjigjet do lexohen qartë. Që pas 14 majit.