Tradita e do që sa herë ka zgjedhje, qeveria hap thesin. Ulen taksat, rriten rrogat, falen gjobat, dhurohen leje legalizimi, mbyllen gropa dhe inaugurohen rrugë. Në fushatën e 25 Prillit u dorovitën edhe paratë e tërmetit, ndërsa në prag të nisjes së fushatës për 14 Majin, Rama premtoi shpërblim 5 mijë lekë për pensionistët.

Por gazetarët që ishin paraqitur në konferencë i kujtuan kryeministrit se akte të tilla katër muaj para zgjedhjeve ishin të ndaluara nga Kodi Zgjedhor.

Sepse shpërndarja e shpërblimeve në prag të zgjedhjeve konsiderohet si blerje e votës nga qeveria dhe duke qenë se kjo nuk është hera e parë që ndodh, ligji e ndalon.

Ndalimi i ligjit e zuri në befasi kryeministrin, i cili në vend se të kërkonte detaje për të marrë një vendim brenda kornizave ligjore, shfaqi një kokëfortësi të pazakontë për t’u dhënë para pensionistëve sa më parë.

I vendosur për t’i shpërndarë këto para sa më shpejt, Rama e quajti ligjin një “kinezëri” që nuk do ta ndalonte.

“Ne nuk mund tu themi pensionistëve që nga taksa e jashtëzakonshme që mblidhet tani në fund të marsit ju nuk mund të merrni gjë se janë ca zgjedhje vendore dhe do prisni 4 muaj, se kështu kanë vendosur së bashku partitë në ato kinezeritë e tyre për të bërë sisteme që janë të panjohura në botë” u shpreh ai.

Përgjigjia e nxorri zbuluar kryeministrin, i cili me këmbënguljen e tij provoi se koha kur duhet të shpërndahen këto para është vendimtare. Shpërblimi duhet të jepet para zgjedhjeve. Dhe nëse ligji bëhet pengesë, ligji është kinezëri.

Në orët e pasdites, kreu i qeverisë i është rikthyer të njëjtës temë. është tërhequr nga përgjigjia arrogante që dha paradite, për të dalë tek një interpretim i ri.

Kodi Zgjedhor sqaroi Rama, e ndalon shpërblimin katër muaj para zgjedhjeve parlamentare, jo katër muaj para zgjedhjeve lokale.

“Neni që ndalon rritjen e pagave 4 muaj para zgjedhjeve lidhet me zgjedhjet politike” ka shkruar mes të tjerash kreu i qeverisë, duke gjetur kleçkën që e shpëton nga ndalimi i Kodit Zgjedhor. Mesazhi më poshtë në Twitter:

https://twitter.com/ediramaal/status/1641127335830208536?ref_src=twsrc%5Etfw%7Ctwcamp%5Etweetembed%7Ctwterm%5E1641127335830208536%7Ctwgr%5E92d3df942be4d2791d9c4abb8b527175ea333528%7Ctwcon%5Es1_&ref_url=https%3A%2F%2Flapsi.al%2F2023%2F03%2F29%2Foferta-5-mije-leke-per-voten-e-pensionisteve-ne-14-maj%2F

Interpretimi i ri që i ka bërë Rama Kodit Zgjedhor e shpëton atë nga penalizimi, por e ndryshon qëllimin e shpërndarjes së parave për pensionistët.

Është e qartë se këmbëngulja për t’ia futur pensionistëve në xhep ato 5 mijë lekë, nuk buron nga dhembsuria për gjendjen e tyre ekonomike, por nga dinakëria e atij që kërkon të blejë 4 vjet pushtet me 5 mijë lekë.

Në raste si këto, kur ishte vetë në opozitë, Rama kishte një këshillë për qytetarët: Merruni paratë se janë tuajat, merrini dhe kthejani shuplakën e votës pushtetit, që kërkon t’ju mbajë peng duke ju trajtuar si skllevër!