Së fundmi miliarderi Elon Musk tha se qeveria duhet të jetë gati të ndërhyjë nëse inteligjenca artificiale del jashtë kontrollit. Gjatë pjesës së dytë të një interviste me prezantuesin e Fox News, Tucker Carlson, Musk tha se do të ishte veprim i zgjuar nëse qeveria krijon një lloj plani ku mund të mbyllë qendrat e shërbimit që fuqizojnë programet e Inteligjencës Artificiale (AI). Ai u shpreh:

“Nuk kemi nevojë t’i hedhim në erë, thjesht ndërpritjani energjinë. Nëse ka diçka për të cilën ne jemi të shqetësuar dhe nuk jemi në gjendje ta ndalojmë atë me komandat e softuerit, atëherë ndoshta do të dëshirojmë të kemi një lloj ndërprerësi të fikjes së harduerit.”

Musk është një nga shumë drejtuesit e teknologjisë që kërkon rregullimin e AI-s. Muajin e kaluar, Musk së bashku me disa ekspertë të tjerë të AI-s, përfshirë bashkëthemeluesin e Apple, Steve Wozniak, nënshkruan një letër të hapur duke bërë thirrje për një pauzë në zhvillimin e AI-s. Musk thuhet se është gati të hedhë modelin e tij të AI konkurrent të ChatGPT. Fusha e inteligjencës artificiale muajt e fundit ka përjetuar një shpërthim të paprecedentë me modele të tilla si ChatGPT ose GPT4. Sipas raporteve pronari i Twitter po planifikon një kompani të AI për të konkurruar me OpenAI, i cili krijoi ChatGPT. Së fundmi shefi i Twitter, ka kërcënuar se do të padisë Microsoft-in, pasi akuzoi gjigantin e teknologjisë për përdorimin e të dhënave nga kompania e tij e mediave sociale pa leje. “Ata stërviteshin ilegalisht duke përdorur të dhënat e Twitter. Koha për një padi”, tha multi-miliarderi në një postim në Twitter.