Shkruar nga Genc Sejko

Opozita nuk vjen dot në pushtet me Ilir Metën. Fotot dhe videot në majë të maleve, paraleleve dhe motorëve me katër rrota tregojnë një sjellje jo normale të një njeriu që ka humbur kontakt me realitetin.

Opozita nuk vjen dot në pushtet me Sali Berishën. I drejtë apo jo vendimi i ndërkombëtarëve ai është i izoluar nga SHBA dhe Britania e Madhe. Dhe ky hall i Berishës nuk mund të jetë hall për shqiptarët. Pasardhësit e Berishës e kanë siguruar të ardhmen e tyre dhe se si e kanë mundësuar këtë u takon atyre ta sqarojnë. Opozita nuk mund të jetë mburojë e askujt përveç se të përfaqësojë interesin e atyre që e kanë votuar.

Opozita nuk vjen dot në pushtet me Ilir Metën. Fotot dhe videot në majë të maleve, paraleleve dhe motorëve me katër rrota tregojnë një sjellje jo normale të një njeriu që ka humbur kontakt me realitetin. Se e bën nga halli apo se ashtu i thotë mendja, ky prapë nuk është hall i shqiptarëve. Po ti shtosh kësaj dhe problemet me “Dum Dumanin” siç e quan ai, kemi një situatë të ngjashme me Berishën ku problemet personale të një individi tentohet të bëhen probleme të të gjithë opozitës.

Opozita nuk vjen dot në pushtet me Lulzim Bashën. Lulzim Basha është shembulli i një lideri që veç pret që ndryshimi të ndodhë nga mosveprimi. Njeriu që nuk erdhi dot në pushtet kur opozita ishte e bashkuar dhe e frymëzuar nuk mund të jetë alternativë kur përfaqëson copat e copave që dalin nga ish PD e madhe.

E vërteta flet qartë: është e pamundur që skena politike të ndryshojë në këto pak muaj që kanë mbetur deri në zgjedhjet e ardhshme. Opozita e fragmentuar do të vijojë rrugën e saj pa krye drejt humbjes së radhës. Koston e kësaj peng marrjeje nuk do ta paguajnë treshja e lartpërmendur por çdo shqiptar që pret të votojë për një alternativë ndryshe dhe më të mirë se ajo e Edi Ramës.

Shënim. Për të mos lodhur gishtat e militantëve të të tre grupimeve të liderëve që kam përmendur më lart. Jo, nuk jam unë zgjidhja. S’kam thënë ndonjëherë që jam, as kam pasur ndonjëherë ambicie që të jem.

Madje as nuk kam ndonjë zgjidhje konkrete për të propozuar. Por në hapësirën time ndoshta kam të drejtë të shfryj për qeverisjen më të korruptuar dhe opozitën më të pashpresë që ka njohur ky vend.