Ndërsa fuqia punëtore ka rënë, bizneset janë në kërkim të punonjësve të kualifikuar, si dhe nxiten të rrisin pagat, paralelisht janë rritur edhe kostot e jetesës, çka ka ndikuar edhe në fenomenin e emigracionit.  Mungesa e një minimumi jetik zyrtar në Shqipëri, ka kontribuuar më shumë në këtë fenomen, duke qenë se një pjesë e popullsisë nuk kanë mjaftueshëm të ardhura për të mbuluar shpenzimet.

Një studim i “Altax” ka dalë në disa konkluzione sa i takon minimumin jetik në Shqipëri, i cili përfaqëson nivelin e të ardhurave që individët dhe familjet duhet të kenë për të mbuluar nevojat e tyre bazë dhe për të shmangur varfërinë. Konkretisht, sipas studimit,  për një qytetar, llogaritet që për të mbuluar nevojat themelore të jetesës si ushqimi, strehimi, energjia, transporti dhe shërbimet shëndetësore, do ti duhen minimalisht rreth 22,000–25,000 lekë në muaj.

Ndërkohë, për një familje me katër anëtarë, që të mbulojë shpenzimet bazike për ushqim, strehim, energji, shërbime shëndetësore, transport dhe shpenzime të tjera sociale dhe edukative, nevojiten të ardhura mujore  në rreth 75,000–85,000 lekë në muaj.

Ky niveli i të ardhurave është i nevojshëm për të përballuar shpenzimet e domosdoshme dhe për të siguruar një cilësi jetese të pranueshme, me mundësi për kujdes shëndetësor, ushqim të mjaftueshëm dhe aktivitete sociale. Pa këtë nivel të të ardhurave, individët dhe familjet përballen me vështirësi për të mbuluar nevojat e tyre bazë dhe për të shmangur varfërinë.

Aktualisht, pagesat sociale nga buxheti i shtetit për kategoritë në nevojë, duke përfshirë dhe pensionet, janë ndjeshëm më të ulëta. Nga ana tjetër për një individ ose pensionist që kërkon të jetojë në kushte dinjitoze, të ardhurat minimale duhet të jenë rreth 45,000–55,000 lekë në muaj (pa qira) ose 60,000–70,000 lekë (me qira).