Mix
Kevin O’Leary zbulon çelësin për të ndërtuar një bazë të fortë klientësh
Nëse një kompani shmang rrjetet sociale, sipas Kevin O’Leary, nuk ia vlen për investim. Gjatë Javës së Biznesit të Vogël, “Mr. Wonderful” ndan historinë e një suksesi që lindi nga konfliktet mes një nëne dhe vajzës së saj.
Kevin O’Leary, i njohur gjerësisht si “Mr. Wonderful” nga emisioni Shark Tank, nuk njihet për ëmbëlsi apo emocion, por kur një biznes e impresionon, ai e tregon hapur. Në një intervistë ekskluzive për Javën e Biznesit të Vogël, O’Leary ndau mendimet e tij për atë që me të vërtetë ndihmon në ndërtimin e një baze të qëndrueshme klientësh: autenticiteti.
Sipas tij, çdo biznes i vogël që kërkon sukses duhet ta fillojë rrugëtimin me një pyetje thelbësore: “Sa njerëz duan këtë produkt dhe sa janë të gatshëm të paguajnë për të?” Ai thekson se momenti vendimtar ndodh brenda shitjeve të para prej 1 milion dollarësh, aty përcaktohet nëse kompania mund të tërheqë dhe të mbajë klientin në mënyrë të leverdishme.
Por në ditët e sotme, një produkt i mirë nuk mjafton. Rrjetet sociale janë kthyer në mjetin kryesor të marketingut dhe sipas O’Leary, asnjë kompani që synon tregun e gjerë nuk mund të përjashtojë këtë platformë. “Nuk do të investoja kurrë në një kompani që nuk është aktive në rrjete sociale. Do të mbetet pas konkurrencës,” thekson ai.
Si shembull i një suksesi autentik, O’Leary përmend kompaninë Wicked Good Cupcakes, themeluar nga nëna e bija Tracey Noonan dhe Danielle Vilagie nga Massachusetts. Ata nuk fituan zemrat e klientëve me fotografi të bukura të ëmbëlsirave, por me postime të sinqerta nga jeta e tyre e përditshme dhe grindjet e natyrshme mes nënës dhe vajzës, që u bënë virale.
“Konfliktet e Dani dhe Tracey ishin legjendare,” kujton O’Leary me buzëqeshje. “Ishte një marrëdhënie e vërtetë, ashtu si shumë nëna dhe vajza që punojnë bashkë. Pikërisht ky realitet krijoi një komunitet besnik që jo vetëm bleu produktet, por u bë pjesë e historisë së tyre.”
Në përfundim, sipas O’Leary, autenticiteti dhe transparenca nuk janë vetëm taktika, janë themeli i një marrëdhënieje afatgjatë me klientin. Dhe në një botë gjithnjë e më digjitale, historitë e sinqerta vlejnë më shumë se kurrë.
