Receta për sufllaqe

Mama të dashura që përpiqeni çdo ditë të ushqeni fëmijët shëndetshëm, e dimë se pavarësisht përpjekjeve ata duan ndonjëherë dhe pica apo ndonjë ushqim tjetër fast-food si sufllaqe për shembull.
Për të mos vuajtur ndjenjën e fajit kur ia blejmë në dyqanin më të afërt fast-food, që një Zot e di ku e marrin atë mishin, me çfarë vaji i skuqin ato patatet apo a e kanë pastruar ndonjëherë atë tostierin ku ngrohin piten, vendosa që dëshirës së fëmijës tim për sufllaqe, që është shumë e rrallë, t’ia dilja vetë në shtëpi.
Dhe besoj se ia dola me sukses sepse hëngrëm sufllaqe dhe nuk patëm vrarje ndërgjegje.
Receta ime:
Pitja:
Zë brumin me miell, kripë, pak sobë buke, ujë të vakët dhe 2-3 lugë vaj ulliri.
E ndan në topa jo shumë të vegjël po sa të krijojë një pite të hollë 5 ml.
E pjek piten e shtruar me okllai në një tigan të nxehur dhe të lyer pak me vaj me një furcë. Në zjarr mesatar e pjek për disa minuta sa të marrë një ngjyrë të artë nga të dyja anët.

Për mbushjen:
Skuq një kokërr patate të prerë hollë dhe të shpëllarë me ujë dhe të kulluar në një pecetë kuzhine.
Pjek një fileto pule ose biftek dhe më pas copëtoje.

Përgatitja:
Shtroje piten mbi një fletë alumini ose letre si ato të fast-food-eve, lyeje me salcë kosi, hidh patatet, mishin, ndonjë fetë të hollë domateje, speca ose qepë sipas dëshirës. Në fund shto ketchup, i vetmi përbërës i gatshëm në këtë përgatitje.
Pitet që ju ngelen mund ti konsumoni me djathë, ose mund ti bëni quesadijas, i mbushni me mish pule, speca, djathë dhe fasule të zeza.
Ju bëftë mirë!