Lidhu me ne

Temporal

PD-ja ka ç’të mësojë nga Edi Rama

PD-ja ka ç'të mësojë nga Edi Rama

Ermir Xhindi*

Te “Doktor Gjëlpëra…”, Konica shkëlqen me atë episodin e famshëm të mjekimit të Arifesë së (erzlliut) Zylfikar agait, me metodën ‘by proxy’. Në pikën ku jemi pas zgjedhjeve, kam përshtypjen se Edi Rama, po e ndihmon në të njëjtën mënyrë PD-në, duke u shkulur dhëmbët e duke u urtuar barkun, ca Zylfikarëve namuzllinj (në kuptimin kulturor), që po e mbajnë peng PD-në.

Rama, në vetë të parë, sot është si Doktor Gjilpëra për PD-në.

Natyrisht, që ca entuziastë naivë kjo që po them, mund t’i nervozojë, çorodisë, hutojë – për ta kuptuar këtë duhet njëlloj empatie, kujtesë dhe kujdes për të mos ngatërruar “sendet” kulturore, përvojën, bindjet, me mjetet politike, pa përjashtuar lidhjet mes tyre.

Është e njëjta gjë, p.sh., me ndryshimin mes “Refleksione”-ve dhe “Kurban”-it e po aq me lidhjen mes tyre. “Refleksione”-t e Ramës dhe Klosit ka qenë ndër librat më elegantë për mua në fillimvitet ’90, pothuaj me të njëjtën joshje të ftohtë, si “Përbindëshi” i Kadaresë, i (ri)botuar afërsisht në në të njëjtën kohë. Rama i “Refleksione”-ve ishte një fillim kulturor, përshtypje, kureshtje, nevojë për identitet, njëlloj etjeje për t’u konstruktuar. Rama i “Kurbani”-t është kulturalisht pasojë e “Refleksione”- ve, por gjendje e një lloji tjetër, politike, projektim i një sistemi në veprim të drejtpërdrejtë. Aty, liria e “Refleksione”-ve humbet, por po aty, paradoksalisht, janë edhe mundësitë për ta realizuar lirinë. Në një tërësi aktesh, që i shëmbëllejnë sistemit, sa më shumë shtohen.

Çfarë mund të mësojë PD-ja nga Edi Rama? Pikësëpari, ai është një stresstest i mrekullueshëm, për të shkuar drejt disa standardeve të reja për PD-në, një mundësi e mirë rithemelimi, të paktën në rrafshin kulturor, pastaj edhe praktik. Edi Rama do ta shtrëngojë Partinë Demokratike t’i ikë të menduarit stilistik, mitologjisë dhe pathetizmit provincial, t’i kthehet Realizmit dhe Punës.

Edi Rama ka treguar se rrënjët e ’91-it janë të holla për të mbajtur e ushqyer një trup të rëndë si ai i Partisë Demokratike. Veprimet e Ramës tregojnë se ai ka mbërritur të shkrijë në një horizont të vetëm disa periudha kulturore nga Rilindja Kombëtare e këtej, ka arritur të riciklojë dhe ndërtojë perspektivë edhe mbi materie të pashpresa, ka guxuar, ka rrezikuar, por jo në tym, por mbi një sistem vlerash.

Përkatësisht, duke rrëzuar në praktikë mitet romantike të shek. XX, majtas e djathtas, nuk ka ecur me inercinë e të qenit “kundër” apo dekonstruksion i dikujt. Ka qenë kreativ. Punëtor. Ka fituar duke qenë i tillë. Një konstrukt kulturor dinamik i mbështetur mbi kreativitetin, pra në thelb – një projekt, është parakushti që ngjall çdo strukturë pune, e bën atë funksionale, krijon besim dhe nxitje.

Këto kualitete ndjellin njëra-tjetrën, pastaj. Një strukturë funksionale ndihmon për të pasur mjete dhe mundësi, josh mekanizma zhvillimi, mposht frikën dhe mosbesimin, dembelizmin, shpie drejt hapësirave të reja të ndërveprimit shoqëror, e çliron këtë të fundit, p.sh., nga elitizmi i shpifur i Bllokut, që çmendurisht gjallon ende në Partinë Demokratike, nga manifaktura qesharake e bindjeve dhe përvojave ku treten identitetet individuale, nga rrethimi grotesk me “lënesha” mediokre pa vlerë.

Natyrisht, që unë kam parasysh modelin Rama, premisat e zhvillimit që prodhon ai model me gjithë kusuret e një vendi e të një shoqërie si e jona. Ama, jam i bindur se nga Rama “in persona”, një njeri me dy pare mend ka ç’të nxërë. E mira është që fitoren e Ramës ta vuajnë Zylfikarët, me shpresën se do të zenë mend, jo zgjedhësit dhe as e djathta, që në rrethana që do t’i uroja, nuk do ta kishin Ramën kulturor mish të huaj.

*Pedagog në Universitetin e Vlorës

Me teper

Kritike1 ditë më herët

Shkodra nuk gjen qetësi. Sepse pushtetin e kanë bandat.

Shkodra nuk gjen qetësi. Sepse pushtetin e kanë bandat. Një tjetër i zhdukur, që u gjend sot i vrarë. Rekordi...

Aktualitet1 ditë më herët

Kjo rrugë të çon në Syrin e Kaltër.

Z. Kryeministër, Pas kësaj rruge ndodhet 1 prej pasurive më të mëdha natyrore të Shqipërisë dhe 1 prej destinacioneve kryesore...

Temporal1 ditë më herët

Emigracioni dëmton forcën e punës, 18 mijë të rinj 15-29 vjeç më pak në një vit

Grup-moshat e reja 15-29- vjeç, pjesë e popullsisë në moshë pune, u tkurrën me shpejtësi përgjatë vitit të kaluar. INSTAT...

Stil2 ditë më herët

5 restorantet që preferoj në Prishtinë

Nga Enver Robelli  E kam të qartë: kjo listë është krejtësisht subjektive, pra një vlerësim fund e krye personal, por është...

Stil2 ditë më herët

Milioneret e instagramit që bëjnë shumë “zhurmë” për para, zbulohen çmimet e Luana Vjollcës, Arbana Osmanit dhe Teas

“Instagrami” sot është kthyer në një biznes shumë fitimprurës për njerëzit e njohur të ekranit. Ka nga ata personazhe që...

Temporal2 ditë më herët

Masakra e Tivarit, tragjedia më e madhe e regjimit komunist

Masakra e Tivarit e vitit 1945 cilësohet ndër ngjarjet më tragjike të popullit shqiptar, kur forcat ushtarake të ish-Jugosllavisë vranë...

Kryesore2 ditë më herët

Basha: S’lejova bashkëpunimin me bandat në zgjedhje, dhe s’do ndalemi deri sa të çmontojmë regjimin Rama-Doshi.

Kryedemokrati Lulzim Basha, në mbledhjen e kryesisë është përballur me debat dhe sulme nga Fatbardh Kadilli. Basha ka deklaruar se...

Stil2 ditë më herët

Tre shenjat e horoskopit që i fshehin ndjenjat

Akrepi Fillojmë me zotin e fshehtësisë dhe dyshimit. Nëse ndonjëherë merrni ndonjë fjalë nga Akrepi, me të vërtetë do të...

Radar2 ditë më herët

Andi dhe Melisa pranuan lidhjen/ Tea mesazh dyshes

Vetëm disa ditë më parë Melisa dhe Andi pranuan lidhjen e tyre, ndërsa ndjekësit u bënë kuriozë për regimin e...

Kioske2 ditë më herët

Si favorizohen oligarkët?

Si favorizohen oligarkët? Kur Kastrati Group bleu Hotel Sheraton në vitin 2018, shumë u çuditën. Një kompani që kishte eksperiencë...

Facebook