Rilindja ka reduktuar në propagandë të fëlliqur çdo proces në këtë vend. Kemi parë sistematikisht të kryhet procesi i ” pornos me varfërinë” ku njerëzit në nevojē vendosen para një kamere ose aparati fotografik, ku janë të detyruar të pohojnë varfërinë e tyre publikisht dhe t’i shprehin qeverisë mirënjohjen për një vakt të dhuruar.

Kemi parë ” Porno me tërmetin” ku një shtëpi e rindërtuar shfaqet dy herë në profilin e kryebashkiakut apo të kryeministrit; një herë me video dhe një herë me foto. Në foto me një arrogancë të pashembullt shfaqet ose kryeministri ose kryebashkiaku, që tundin çelësat e shtëpisë së rindërtuar a thua se ajo shtëpi është ndërtuar nga të ardhurat personale të këtyre të fundit. Në video kryebashkiaku ose kryeministri shihen si hyjni të zbritura mbi tokë dhe harrohet fakti që falenderimi duhet t’u shkojë të gjithë taksapaguesve shqiptarë dhe jo dyshes rilindase që bën një propagandë të fëlliqur me këto taksa.

Kemi parë skena të neveritshme nga kryebashkiaku në kohën e mbylljes në pandemi, ku është bërë ” porno edhe me vdekjen”. Kryebashkiaku me 10 kamera me vete shkon t’i çojë një gruaje të moshuar ndihma. Gruas së moshuar i kish vdekur i biri. Sapo sheh Veliajn përmes klithmave të pashoqe ajo thotë- Sot që të pash ty, më iku dhimbja për djalin. Zëre se më hyri djali në shtëpi. I gjithë ky skenar i parapërgatitur nga skenaristi i neveritshëm Veliaj nuk është gjë tjetër veçse ” porno me vdekjen”.

Sikur mos mjaftonte i gjithë ky proces pornografik me çdo çështje në këtë vend, qeveria nuk do të na kursente as ” pornon me vaksinën”.

I gjithë kabineti qeveritar për të pritur 3 kuti me vaksina në aeroport. Një proces vaksinimi që kryhet në stadium. Ku është parë e ku është dëgjuar kjo?!

Një çadër cirku që ngrihet në qendrën e kullëzuar të qytetit pranë vendit ku hahen qofte dhe pihen birra dhe kryebashkiaku mes jargavitjes së tij tipike dhe “”humorit”” thotë- Ja njerëzit bëjnë vaksinën atje dhe pastaj hanë qofte këtu.

Gazetarë që në studiot e ” Top Channel” ndërpresin emisionin e lajmeve dhe e bëjnë vaksinën në transmetim direkt.

Gra e burra në çdo cep të Shqipërisë para kamerave zbërthejnë këmishën a bluzën, nxjerrin krahun dhe aparati fokuson pikërisht atë çastin kur shiringa futet në tul.

Sikundër fokusohet çasti kur jepet qesja e ndihmave, ashtu fokusohet edhe çasti kur vaksina futet në tul.

Një shfaqje të tillë nuk ka nguruar ta japë as kryebashkiaku i Ersekës, Erjon Isaj.
Skema është e njëjtë.
Hapet këmisha, nxirret krahu, infermierja bën gati shiringën dhe afrohet, vaksina prek tulin, i vaksinuari qesh dhe fotografia shkrepet.

Post Scriptum- Të gjitha proceset që përmenden më lart, nuk janë gjë tjetër veçse një poshtërim i mirëfilltë për çdo shqiptar.

Elona Caslli