Për njerëzit që dreka i zë jashtë shtëpisë, jo rrallë është tundim (dhe realitet) ngrënia e ushqimeve të gatshme me shumë kalori dhe shumë yndyrna. Por për një shëndet më të mirë dhe për të larguar rrezikun e shtimit në peshë, ndiqni disa këshilla të thjeshta.

Vakti juaj kryesor i ditës duhet të përmbajë proteina, karbohidrate nga prodhimet e grurit, afërsisht gjysma e pjatës suaj duhet të përmbajë perime ose fryta; një e katërta duhet të ketë proteina, si peshk, pulë, fasule ose gjizë me pak yndyrë, një e katërta duhet të ketë drithëra, si p.sh. një fetë bukë e zezë, ose gjysmë filxhani oriz kafe apo makarona gruri. Gjithashtu mund të shtoni dhe një sasi yndyrnash të shëndetshme, si një lugë gjell vaj dhe uthull për sallatën tuaj.

Sallatë është e mirë, por duhet të jeni të kujdesshëm. Shpesh sallata shoqërohet me djathë apo majonezë, ton etj, të cilat përmbajnë yndyrna të pashëndetshme, ëmbëlsues ose kripë. Pa përmendur këtu shumë kalori. Ja se si mund ta përgatisni drekën tuaj.

1. Mbusheni pjatën tuaj me sallatë jeshile dhe perime të gjalla apo të pjekura.
2. Shtoni disa proteina – mund të shtoni fasulet që janë një burim i mirë fibrash. Një tjetër burim proteinash përfshijnë pulën e pjekur, gjizën pa yndyrë ose vezë të ziera të prera në copa. Tregohuni të kujdesshëm me djathin.
3. Shtoni një sasi të vogël yndyrnash të shëndetshme. Mund të shtoni një sasi të vogël arrash ose farash. Ato përmbajnë yndyrna të pangopura, të mira për zemrën dhe proteinë të shëndetshme, duke ju dhënë ndjesinë e ngopjes dhe duke e ndihmuar stomakun tuaj të qëndrojë plot për më gjatë. Gjithashtu mund të shtoni edhe pak vaj ose uthull.
4. Drithërat dhe frutat janë gjithashtu një zgjedhje e mirë për një sallatë të shëndetshme./ Arlinda Gjypi