Kryetarja e LSI-së, Monika Kryemadhi ka sulmuar Komisionin Hetimor të Inceneratorëve, duke u shprehur se u kthye në një seancë amnistuese për Erion Veliajn.

Me anë të një postimi në Facebook, Kryemadhi thotë se seanca përfundoi me shpëtimin e deputetit Alqi Bllako. Kryetarja e LSI-së ka publikuar disa tabela ku pretendon se babai Bllakos, ka përfituar një pjesë të fitimit të inceneratërve.

Sipas saj, babai i deputetit socialist ka një pagë prej 10 mln lekësh në muaj, dhe këtë shumë e ka marrë për 16 muaj me radhë.

Postimi i Monika Kryemadhit:

Komisioni hetimor ditën e sotme, nisi si një seancë amnistuese për Erion Veliaj dhe përfundoi me shpëtimin e deputetit të PS Bllako nga përgjigjet publike për rolin e tij në aferën e inceneratorëve.

Shikoni tabelën që tregon si babai i deputetit Bllako ka përfituar një pjesë të fitimit nga inceneratorët, si pagë për babain e tij, direkt i punësuar nga inceneratori i Tiranës. Pagë plot 10 milionë lekë në muaj për 16 muaj.

Ky fakt dhe shumë fakte të tjera financiare tronditëse, i kemi vendosur në dispozicion të SPAK për hetimet e tij. Fakte të tjera tronditëse mund të dalin në dritë.

Nesër ndiqni filmin e radhës në Komision, ndërsa prova e vërtetë e integritetit qëndron tek prokurorët e SPAK dhe drejtësia e re. A do të funksionojë ligji kundër pushtetarëve që kërcënojnë qytetarët duke pretenduar se kanë kontrollin e SPAK?

2022 duhet të jetë viti i drejtësisë së vërtetë! Kjo është pritshmëria e çdo shqiptari.