Mamitë në një spital në Britani tanimë duhet të tregohen të kujdesshme me mënyrën si flasin, pasi u është kërkuar të mos thonë fjalën “vagina”, në mënyrë që të mos ofendohen pacientet transgjinore shtatzëna.

Udhëzimi është prezantuar nga shefat e shëndetësisë në Sussex si pjesë e politikës së tyre për kujdesin perinatal (që më parë njihej si shërbimet e maternitetit), që të përshtatet për personat transgjinorë dhe jobinarë.

Siç shkruan Daily Mail, në udhëzuesin e ri kujdesit shëndetësor të Spitaleve Universitare të Brighton dhe Sussex, mamive dhe mjekëve obstetër u thuhet që në vend të fjalës “vaginë”, të thonë “vrima e përparme” ose “hapja gjenitale”.

Stafi inkurajohet të regjistrojë kushte e kërkuara nga pacientët në një dokument të quajtur “Preferencat e mia gjuhësore”.

Ka një listë të pjesëve anatomike si qafa e mitrës, mitra dhe gjinjtë krahas një kolone ku mund të shkruhen fjalët e preferuara.

Udhëzimet shtojnë se kujdesi i maternitetit zakonisht është projektuar si një ‘shërbim vetëm për gratë’ i cili mund të mos u shërbejë nevojave të individëve ‘trans‘ dhe ‘jobinarë‘ të cilët nuk identifikohen si meshkuj apo femra.

Pacientët shtatzënë transgjinorë duhet të trajtohen sipas “gjinisë së tyre të vetë-identifikuar” dhe jo sipas gjinisë së tyre të lindjes, thuhet në udhëzim.

Një mami zbuloi se një numër i stafit të maternitetit janë të pakënaqur, por kanë frikë të flasin hapur.

Mamia e cila kërkoi të mbetet anonime, tha: “Është një politikë që lidhet me shumë pak njerëz dhe ata mendojnë në një farë mënyre se është qesharake, por për shkak të klimës në spital nuk guxojnë të thonë asgjë.”

Muajin e kaluar nisi një tjetër politikë e re në këto spitale, ku stafit iu kërkua që fraza “qumështi i gjirit” të zëvendësohej me “qumësht njeriu” ose “qumështi nga prindi që ushqen”.