Kreu i Partisë Demokratike, Sali Berisha, në një bashkëbisedim me Diasporën dhe emigrantët në Zelandën e Re. Në fjalën e tij Berisha theksoi se Partia Socialiste ka rikthyer monizmin e plotë duke marrë nën kontroll 99.9% të pushteteve.

Berisha shtoi se emigrantët janë të përjashtuarit e mëdhenj nga vendi,. teksa theksoi se qeveria i hoqi të drejtën për të votuar Diasporës.  

“Unë e kam pritur me shumë interes këtë takim me ju.

Para së gjithash për të dëgjuar zërin tuaj, opinionet, sugjerimet e mendimet tuaja.

Pasi në bindjen time më të thellë, kontributi juaj dhe angazhimi i diasporës për t’i dhënë një përgjigje kësaj situate realisht kritike në të cilën ndodhet vendi, është i domosdoshëm.

Por jo më pak e domosdoshme është gjithashtu njohja e rolit tuaj në zhvillimet e këtij vendi. De facto në rrafshin politik emigracioni dhe politika janë të përjashtuarit e mëdhenj nga Shqipëria.

Shqipëria nuk mbyll kufij si dikur ndaj emigracionit dhe diasporës, por ajo nuk ka lejuar votën tuaj.

Nuk ka vendosur bashkëpunim të domosdoshëm  për zhvillimin e saj dhe përparimin e shqiptarëve.

Unë dua të sjell në vëmendje disa nga zhvillimet me dramatike.

E para, pas zgjedhjes së Presidentit të Republikës, PS ka rikthyer në Shqipëri monizmin e plotë.

Në vitin 2020 maxhoranca arrin të ketë 91% të pushtetit në vend, më shumë se ç’kishte Partia e Punës në vitin 1991.

Pas zgjedhjes së Presidentit përqindja shkon në 99.9%.

Së dyti, në 1991 kur Shqipëria hapi kufijtë shqiptarët u dyndën nga deti, toka, ajri për të shpëtuar nga dhimbjet e tiranisë së mjerimit të trashëguar jashtë vendit të tyre.

Nga viti 2007 deri në vitin 2014, pati lëvizje të popullatës por në Shqipëri popullata rritej çdo vit.

Pas vitit 2014 pothuajse u rishfaqën eksodet e shqiptarëve, por kësaj here për fatin më të keq të vendit shtresa e mesme më së shumti, vitin që kaloi në rrafshin demografik është një kthesë dramatike.

Për herë të parë vendi pati 3.300 lindje më pak se sa vdekje. Kombi sot është shndërruar në një komb që rrit fëmijë për emigracion.

Së treti, nuk dua të bëj analizë të hollësishme, por do të ndalem vetëm në diskursin e këtyre javëve në Shqipëri. Legalizimi i drogës dhe amnistia fiskale për paratë e drogës”, tha Berisha.