Nëse do të vish – Poezi

Nëse do të vish – Poezi nga Bilbil Beqiri

 

Eja thjesht, si njeri,

pa trastat mbushur plot,

pa flori,

pa stoli,

trokit në derë me dashuri,

e portat e sarajeve të shpirtit
do t’i hap dy kanatesh për ty.

Po nëse do vish,

me një trëndafil,
pa dashuri ujitur,

me një rrugë,
pa dashuri stisur,

a si njeri,
pa dashuri rritur –

kurrë mos eja të më gënjesh:

të gjitha portat e sarajeve të shpirtit,

deri në fund…
të kyçura do t’i gjesh.