Kocka e një zhurme që synon të largojë vëmendjen nga inceneratorët dhe AKSHI

Nga Respublica.al

Kocka e një zhurme që synon të largojë vëmendjen nga inceneratorët dhe AKSHI

Ilir Meta (jo Metaj) është spiun. Ai ka qenë bashkëpunëtor i Sigurimit të Shtetit dhe këtë fakt gjëmëmadh qeveria e Partisë së Socialistëve të Shqipërisë ia vuri shqiptarëve para në ditën e parë pasi ai mbaroi detyrën e Presidentit të Republikës.

Ilir Meta ka qenë spiun në moshën 18 vjeçare dhe ligji kërkon strikt që ai të mos jetë në funksione publike. Por fakti i dalë nga llagëmet e frikës së PS-së për pushtetin e vet, vjen pasi Meta u bë mocionist, Kryeministër, ministër i Jashtëm, zv.kryeministër, kryetar i Kuvendit dhe President.

Ky është një fakt që synon të neutralizojë politikisht një kundërshtar që ka provuar se po ia çon në burg bashkëpunëtorët Edi Ramës dhe që nuk ka asjë lloj vlere, as politike e as morale, në kushtet kur Meta meriton të gjykohet për korrupsion dhe kur ai në detyrat e veta ndër vite ka patur akses në informacionin më sensitive të mundshëm.

Çfarë passjell atëherë zbulimi i dosjes së bashkëpunimit? Asgjë. Vetëm kënaqësinë e disave dhe inskenimin e një gjyqi popullor në funksion edhe të skualifikimit të tij nga e drejta për të kandiduar për deputet.

Nuk është çudi që pas dekriminalizimit që I hoqi z. Rama shumë njerëz të vihet si kusht kandidimi kjo lodra e dosjeve dhe shpallja non grata, në mënyrë që ai që është kryeministër të bilbilojë vetë i qetë. Dhe të duartrokitet.

Jemi në kushtet që një kuadër ligjor po përdoret me cinizëm për të pastruar skenën nga ata kundërshtarë që në fakt i ricikloi korrupsioni i këtyre që sot bëjnë moral. Dhe gjykojnë.

Pyetja që ka rëndësi sot nuk është nëse ka qenë apo jo Meta bashkëpunëtor, por çfarë vlere ka kjo tashmë?

Pas 30 vjetëve batërdije të përbashkët.