Një finaliste e Miss Anglisë është bërë mbretëresha e parë e bukurisë që konkurron pa grim në historinë gati shekullore të konkursit.

Melisa Raouf, një studente kolegji 20-vjeçare nga Londra jugore, eci në gjysmëfinalen e konkursit të hënën me një pamje totalisht natyrale. Tani, ajo do të garojë në finale këtë tetor për kurorën.

“Kjo do të thotë shumë për mua pasi ndjej se shumë vajza të moshave të ndryshme përdorin grim sepse ndihen nën presion për ta bërë këtë”, tha Raouf në një intervistë për gazetën Independent.

“Nëse dikush është i lumtur me lëkurën e tij, nuk duhet të detyrohet të mbulohet me grim. Të metat tona na bëjnë ata që jemi dhe kjo është ajo që e bën çdo individ unik,” shtoi ajo.

Raouf tha se, megjithëse filloi të grimohej në moshë të re, ajo vendosi t’i shmangej traditës për konkursin.

“Kurrë nuk kam ndjerë se i kam përmbushur standardet e bukurisë. Së fundmi kam pranuar që jam e bukur në lëkurën time dhe për këtë arsye vendosa të konkurroj pa grim”, ka përfunduar ajo.