E shtuna mediatike e Sali Berishës iu dedikua komunikimit të tij me mbështetës në rrjetet sociale mbi politikën ekonomike, jetën sociale në vend dhe alternativën e demokratëve nëse vijnë në pushtet.

Qytetarët e pyetën se si zgjidhet kriza ekonomike e vendit dhe si ndalet emigrimi masiv i shqiptarëve. Berisha renditi 5 momente kryesore të programit të forcës kryesore në opozitë. “Minimum jetik, arsim masiv, mbështetje financiare për çiftet e reja, rikthim i të rinjve në vend dhe politikë për të financuar fëmijën e tretë në familje”.

Në kushtet e një rritjeje të vazhdueshme të çmimeve, dhe duke i konsideruar të pamjaftueshme masat e qeverisë, Berisha tha se nëse vjen në pushtet do të rrisë deri në dyfishim pagat e sektorëve më të rëndësishëm që ofrojnë shërbime publike për qytetarët.

 “Ne do të dyfishojmë rrogat e punonjësve të shëndetësisë, do të garantojmë një buxhet të mjaftueshëm për modernizimin dhe reformimin e sistemit të shëndetësisë. ju garantoj se PD do të dyfishohet pensionet ndihma ekonomike e rrogave”, tha ai.

Duke i qëndruar devizës së ish-presidentit amerikan Reagan, se qeveria është problemi, Berisha pranon dështimin me legalizimet dhe gabimin fillestar me pronat. “Natyrisht, nga viti 1990 gjer më sot, shumë gjëra do kisha bërë ndryshe. Një nga gjërat që do bëja ndryshe, është ligji për tokën. Përveç kësaj, pa diskutim që në tërësinë e reformave, disa prej tyre mund të ishin ridimensionuar”.

Lideri i demokratëve kryefjalë në këtë takim kishte thirrjen për protesta masive deri në largim të qeverisë së Edi Ramës. Nga Facebook i erdhi një pyetje edhe mbi takimin e ambasadores amerikane Yuri Kim me Ilir Metën. Mesazhi i tij erdhi në një fjali sinkron. “Një takim normal i një ambasadores së SHBA me një partner të PD”.