Rama në Davos

Sulmet kibernetike e goditën rëndë Shqipërinë, ndërsa hakerët iranianë i hoqën brekët shtetit dixhital dhe vijojnë të publikojnë të dhëna te ndjeshme të shqiptarëve. Prej verës së kaluar janë publikuar gjithçka që kanë institucionet shtetërore për çdo biznes dhe çdo shqiptar dhe ato dolën në shitje onlone për blerës të mundshëm. Qeveria shqiptare që ka harxhuar rreth 200 milionë euro për shërbimet online e pranoi shumë vonë dështimin dhe kërkoi ndihmën e SHBA-ve për të forcuar mbrojtjen nga sulmet kibernetike. Por, edhe pse hakerët vijojnë të nxjerrin të dhëna siç janë llogaritë bankare te kompanive dhe individëve në një bankë të nivelit të dytë dhe këcënojnë me publikime të tjera të rëndësishme, kryeministri Rama deklaroi në Forumin Ekonomik të Davosit dhe qeveria i ka përballuar më së miri sulmet.

Gjatë fjalës së tij, Rama u ndal edhe te sulmet kibernetike. Ai tha se në 6-7 vite 95% e shërbimeve kanë kaluar online dhe se vitin e kaluar Shqipëria u sulmua shumë rëndë nga Irani, mirëpo edhe pse nuk ka sistemet teknologjike të fundit arriti ta menaxhojë më së miri dhe arriti që të ruajë të dhënat.

“Ia dolëm të bëheshim për 6-7 vitet e fundit vendi që ka 95% shërbime tërësisht online. Nuk ka më nevojë të kontaktoni zyra. Kjo ka ndihmuar shumë. Por në të njëjtën kohë na ka ekspozuar shumë. Vitin e kaluar u sulmuam shumë rëndë nga Irani. Sigurisht bëmë me shumë vëmendje në çdo hap investigime me ekspertë të FBI-së dhe Microsoft dhe ende jemi të sulmuar, praktikisht ditë pas dite. Megjithatë, edhe pse nuk kemi një siguri kibernetike të fjalës së fundit, ne arritëm që të shmangim zhdukjen tërësore të sistemeve që kishim dhe praktikisht shmangëm humbjen e të dhënave, çka ishte edhe synimi i sulmit. Ne kemi rrezistuar mirë krahasuar me synimin e agresorëve. Bazuar në raportin ishte shumë e qartë që autorët kishin synim fundor fshirjen e sistemeve për të na kthyer te epoka e gurit”, tha Rama.