Në konferencën e përjavshme për mediat, kryedemokrati Sali Berisha foli për aferën e inceneratorëve, duke i mëshuar faktit se “koka” është Edi Rama. Sipas Berishës në gropën e Sharrës po fundoset edhe sistemi i drejtësisë, referuar mungesës së drejtësisë, siç e konsideron ai.

“Ndonëse prej dy vitesh është deklaruar me dhjetëra herë se qytetarët e qarkut të Tiranës, paguajnë 29 euro për çdo ton pleh, pa llogaritur transportin, kjo tarifë e cila në kontratë parashikohet për djegie. Kurse për depozitim ka një tarifë prej 11 eurosh.

Prej vitesh, Edi Rama, Erion Veliaj, presin euro, vjedhin çdo ditë dhjetëra-mijëra euro. Në total, diferenca prej 18 eurosh për çdo ton, shkon dhe depozitohet në kontot offshore të këtyre dy hajdutëve të paimagjinueshëm. Në fakt, aty nuk po groposoheshin, por aty po groposej sistemi i drejtësisë dhe shteti ligjor”, tha Berisha.

Ky i fundit theksoi se janë bërë 51 milionë euro pagesa nga qytetarët e Tiranës për kompanitë offshore.

“Janë bërë 51 milionë euro pagesa nga qytetarët e Tiranës për kontot offshore të Edi Ramës dhe Erion Veliajt, për plehra që dikur digjen, në një kohë kur as nuk digjen, por as nuk seleksionohen, siԷ u betua dhe rrahu gjoksin sipërmarrësi i plehrave, Edi Rama, nën betim para parlamentit shqiptar. Nuk ka akt më flagrant se afera e inceneratorëve. Nuk ka akt më të turpshëm se qëndrimi i drejtësisë ndaj kësaj afere”, shtoi ai.

Berisha: Olta Xhaçka, një mafioze që e ka vendin në burg!

Kryetari i Partisë Demokratike, Sali Berisha është ndalur tek mandati i deputetes Olta Xhaçka, të cilin po e shqyrton Gjykata Kushtetuese. Sipas Berishës, kjo e fundit është nën presion nga klani Rama, për ta shpëtuar atë.

Në konferencën e përjavshme me gazetarët, Berisha e quajti Olta Xhaçkën mafioze, që e ka vendin në burg.

Berisha denoncoi Edi Ramën, Olsi Ramën, Artan Gaxhin dhe Amant Josifin si personat që po ndikojnë në vendimin e Gjykatës Kushtetuese.

“Olta Xhacka duke përdorur pushtetin lidhjet e saj me klanin Rama, lidhje të kahershme. Nuk kam asgjë unë të hyj në lidhje të kahershme, por kur ato mjerojnë shqiptarët  unë cdo gjë do them. Janë vërsulur, Olsi, Edi, Artani, Josifi për të mposhtur gjykatën Kushtetutën. Një akt që do përbente atentat të vërtetë ndaj kushtetutës dhe një goditje mëshirë për luftën kundër korrupsionit.

Olta Xhacka me burrin e vetë kanë fituar statusin 5 mln të investitorit strategjik. Olta Xhacka ka inkriminuar kunatën e saj amerikane si ortake në këtë aferë. Olta Xhacka me këto veprime e ka vendin në burg dhe vetëm në burg. Tani kërkon të shpëtojë. Gjykata Kushtetuese në këtë rast ka kauzisin më të qartë dhe pikërisht për përpjekjen që bën Parlamenti për të shkelur kushtetutën ajo duhet ti dalë zot Kushtetutës. Të mendosh se të shpëtojë Olta, pse Edi Rama nuk pranoi të vijë në parlament kërkesa, nuk ka tallje më të madhe me qytetarët shqiptarë, të implikimit direkt të Edi Ramës, por edhe të atyre që mendojnë të gjykojnë në këtë mënyrë”, tha Berisha.